नालासोपारा येथील घटना
विरार : नालासोपारा येथे एका इमारतीचा स्लॅब कोसळल्याची घटना समोर आली आहे. यात ३५ हून अधिक लोक अडकले असून त्यांना बाहेर काढण्याचे काम अग्निशमन दलाच्या मदतीने सुरू होते. या घटनेत कुणीही जखमी झाले नसल्याची माहीती पालिकने दिली आहे.
नालासोपारा पुर्वेच्या तुळींज परिसरातील साई निवास या एक मजली चाळीचा रविवारी सकाळी १० च्या सुमारास बाल्कनीचा भाग अचानक कोसळून खाली आला. या इमारतीच्या पहिल्या मजल्यावर २१ सदनिका तर तळ मजल्यावर १० सदनिका आहेत. रविवार असल्याने बहुतांश नागरिक घरात असल्याने दारासमोर स्लॅब कोसळल्याने घरातच अडकून पडले. घटनेची माहिती मिळताच अग्निशमन दल घटनास्थळी पोहचून लोकांना सुखरूप बाहेर काढण्याचे काम सुरू केले.
याबाबत माहिती देताना पालिकेच्या सहायक आयुक्त विशाखा मोटघरे यांनी माहिती दिली की, सदर घटनेत कुणीही जखमी झाले नाही. सर्व रहिवाशांना बाहेर काढण्याचे काम सुरू आहे. सदरची इमारत धोकादायक इमारत घोषित केली नसल्याचे त्यांनी सांगितले. तर रहिवाशांनी ही इमारत २५ वर्षे जुनी असल्याची माहिती दिली. यामुळे ही इमारत धोकादायक असतानाही पालिकेच्या यादीत याची कोणतीही नोंद नसल्याने शहरातील धोकादायक इमारतीचा प्रश्न पुन्हा चर्चेला आला आहे.