सेवा विवेक सामाजिक संस्थेतर्फे मोफत प्रशिक्षण
ठाणे : पालघर जिल्ह्यातील आदिवासी गरजू महिलांना घरकाम सांभाळून त्यांना आर्थिक हातभार लाभावा, त्यांना सन्मानजनक रोजगार प्राप्त व्हावा या हेतूने ‘सेवा विवेक’ या संस्थेकडून आदिवासी महिलांच्या सक्षमीकरणासाठी बांबू हस्तकलेचे मोफत प्रशिक्षण दिले जात आहे.
बांबू हस्तकला स्वयंरोजगार निर्मितीसाठी देण्यात येणा-या प्रशिक्षण वर्गाच्या १५ व १६ तुकडीची सुरुवात दहिसर व धुकटन दांडेकरपाडा येथे झाली. यामध्ये बांबूपासून विविध प्रकारचे कंदिल, राखी, पेन होल्डर, मोबाईल होल्डर, पात्राधर, फिंगर जॉइंट ट्रे आदी ३६ बांबू हस्तकलेच्या आकर्षक वस्तू तयार होत असून उत्पादनाच्या दर्जेदारपणामुळे चांगली मागणी आहे, असे सरपंच प्रसाद भोईर यांनी ‘ठाणेवैभव’ला सांगितले. या मागणीचा थेट परिणाम पालघर जिल्ह्यातील आदिवासी महिलांच्या रोजगार निर्मितीवर दिसून आला आहे. ७० आदिवासी महिला सलग ३० दिवस चालणा-या प्रशिक्षणाचा मोफत लाभ घेणार आहेत.
प्रशिक्षण शिबिराचे उदघाटन प्रमुख पाहुणे ‘सेवा विवेक’ चे मार्गदर्शक अध्यक्ष रमेश पतंगे, धुकटन दांडेकरपाडाचे सरपंच प्रसाद भोईर , दहिसर येथील शिक्षक दशरथ केणी, संस्थेचे मुख्य कार्यकारी अधिकारी लुकेश बंड, प्रशिक्षण व विकास अधिकारी प्रगती भोईर यांच्या हस्ते झाले. यावेळी उपस्थित असलेल्या मान्यवरांनी महिलांना बांबू हस्तकलेचे महत्त्व, त्यापासून उपलब्ध होणा-या रोजगाराची माहिती दिली.
पालघर तालुक्यातील दहिसर देवलीपाडा आणि धुकटन दांडेकरपाडा येथील प्रशिक्षण वर्गाला कुशल बांबू हस्तकला शिकलेल्या ‘सेवा विवेक’ संस्थेतील कुशल प्रशिक्षक महिलांद्वारेच हे प्रशिक्षण दिले जाणार आहे. या संस्थेच्या ग्रामपातळीवर बांबू ग्रामोद्योग उत्पादनाच्या माध्यमातून पालघर जिल्ह्यातील ग्रामीण भागात रोजगार उपलब्ध होण्याच्या उद्देशाने बांबूपासून अनेक आकर्षक वस्तू तयार करण्यात येत आहेत. गेल्या काही वर्षांपासून पालघर जिल्ह्यातील शेकडोहून अधिक आदिवासी महिलांना बांबू हस्तकलेचे प्रशिक्षण देण्यात आले आणि प्रशिक्षण पूर्ण घेतल्यावर महिलांनी बांबूपासून उत्तम दर्जेदार पर्यावरण पूरक उत्पादने तयार करण्यात हातखंडा मिळवला आहे.