आमदार संजय केळकर अधिवेशनात आवाज उठवणार
ठाणे : वीज बिलातील वहन आकार नियमबाह्य असून या संदर्भात आपण अधिवेशनात आवाज उठवून नागरिकांना न्याय देण्याचा प्रयत्न करणार असल्याचे आमदार संजय केळकर यांनी सांगितले.
कळवा येथील टोरंट कार्यालयात झालेल्या बैठकीत आमदार केळकर यांनी वीज देयकासह प्रत्येक ग्राहकाकडून वहन आकार वसूल केला जात असल्याबाबत नाराजी व्यक्त केली. हा आकार नियमबाह्य असल्याचा दावा मंदार भट यांनी केला. वीज वितरण कंपन्या सर्व प्रकारच्या ग्राहकांकडून वीज वहनआकार वसूल करतात. राज्य सरकारी महावितरण कंपनी नोव्हेंबर 2016 पासून ही वसुली करीत आहे ही वसुली नियमबाह्य असल्याने ती एक प्रकारे लूट आहे. या लुटीचा आकडा जवळपास 70 ते 80 हजार कोटी रुपये असल्याचा दावा मंदार भट यांनी केला आहे. या संदर्भात ते न्यायालयीन लढा लढत आहेत. वहन आकार नियमबाह्य आहे वीज कायदा व त्यामधील सुधारणानुसार हा वहन आकार केवळ ओपन एक्सेस अर्थात एक मेगा वॅटहून अधिक थेट वीज खरेदी करणाऱ्याकडूनच वसूल करता येतो. पण राज्यातील सर्व वीज वितरण कंपन्या हा आकार सर्वच ग्राहकांकडून वसूल करीत आहेत मुख्य म्हणजे ही वसुली फक्त महाराष्ट्रातच सुरू आहे. महाराष्ट्रात शिंदे-फडणवीस सरकार आहे आणि हे सरकार लोकहिताचे निर्णय घेणारे सरकार आहे, त्यामुळे लोकांच्या हिताचा निर्णय हे सरकार घेईल आणि या संदर्भात आपण ऊर्जामंत्री व उपमुख्यमंत्री देवेंद्र फडवणीस यांची शिष्टमंडल घेऊन भेट घेऊन त्यांना या संदर्भातली माहिती देऊ असे संजय केळकर यांनी म्हटले आहे.
यावेळी बैठकीत मंदार भट, नरेश पवार, ठाणे शहर सरचिटणीस मनोहर सुखदरे, दिवा, कळवा, मुंब्रा, कौसा, शीळ मंडल अध्यक्ष आदी कार्यकर्ते उपस्थित होते.