निवडणूक आयोगाचा मोठा खुलासा
मुंबई: राज्यातील २८८ विधानसभा मतदारसंघातील १४४० व्हीव्हीपॅट युनिट्सची स्लिप गणना संबंधित कंट्रोल युनिट डेटासह केली गेली आहे. संबंधित जिल्हा निवडणूक अधिकाऱ्यांकडून प्राप्त झालेल्या अहवालानुसार व्हीव्हीपॅट स्लिपचा काउंट आणि ईव्हीएम कंट्रोल युनिट काउंटमधील आकडेवारी समसमान आहे. त्यामध्ये, कोणतीही तफावत आढळलेली नाही, असा खुलासा निवडणूक आयोगाने केला आहे.
राज्यातील विधानसभा निवडणुकांच्या निकालानंतर ईव्हीएम मशिनवर मोठी शंका उपस्थित होत आहे. विधानसभेच्या विशेष अधिवेशनात देखील महाविकास आघाडीच्या आमदारांनी ईव्हीएमवर शंका उपस्थित करत, माळशिरस मतदारसंघातील मारकडवाडी गावातील नागरिकांनी बॅलोट पेपरवरील मतदान प्रक्रियेच्या निर्णयाचे समर्थन केले आहे. येथील आमदार उत्तमराव जानकर यांनी देखील पुन्हा मतदान घेण्याची मागणी केली आहे. आमचे मत कोणाला पडलं हे कळण्याचा आम्हाला अधिकार आहे, असेही त्यांनी म्हटलं. या वादावर आता निवडणूक आयोगाने स्पष्टीकरण दिले आहे. तसेच, व्हीव्हीपॅट मशिनमधील मोजणीत कुठेही तफावत नसल्याचे निवडणूक आयोगाने स्पष्ट केले. त्यामुळे, ईव्हीएमच्या आरोपात कसलेली तथ्य नसल्याचं आयोगाने सांगितल्याचं दिसून येते.
एकीकडे मारकडवाडी गावात महाविकास आघाडी व महायुती यांच्यात ईव्हीएमच्या मुद्द्यावरून जुंपल्याचे दिसून येते. दुसरीकडे वंचित बहुजन आघाडीचे प्रमुख प्रकाश आंबेडकर यांनी देखील मतदानादिनी सायंकाळी 5 ते 6 या वेळेत वाढलेल्या मतदानावर प्रश्न उपस्थित केले आहेत. याबाबत निवडणूक आयोगाला पत्रही लिहिले आहे. या चर्चा आणि गोंधळदरम्यान निवडणूक आयोगाने मतमोजणी प्रक्रियेतील व्हीव्हीपॅट मशिनबाबत मोठा खुलासा केला आहे. राज्यातील विधानसभा निवडणुकांच्या मतमोजणीवेळी भारतीय निवडणूक आयोगाच्या मार्गदर्शक तत्त्वांनुसार प्रत्येक विधानसभा मतदारसंघ/विधानसभा विभागातून पाच मतदान केंद्रांची निवड करण्यात आली होती. आयोगाने निवडलेल्या या 5 मतदान केंद्रांच्या व्हीव्हीपॅट स्लिपची मोजणी करणे अनिवार्य होते. त्यानुसार, येथील व्हीव्हीपॅट मशिनची मोजणी करण्यात आली आहे.
23 नोव्हेंबर रोजीच्या मतमोजणी प्रक्रियेदरम्यान प्रत्येक विधानसभा मतदारसंघातील निवडलेल्या पाच मतदान केंद्रांची व्हीव्हीपॅट स्लिप मोजणी 23 नोव्हेंबर 2024 रोजी मतमोजणी निरीक्षक/उमेदवारांच्या प्रतिनिधींसमोर करण्यात आली आहे. त्यानुसार, महाराष्ट्र राज्यातील २८८ विधानसभा मतदारसंघातील १४४० व्हीव्हीपॅट युनिट्सची स्लिप गणना संबंधित कंट्रोल युनिट डेटासह केली गेली आहे. संबंधित जिल्हा निवडणूक अधिकाऱ्यांकडून प्राप्त झालेल्या अहवालानुसार व्हीव्हीपॅट स्लिपचा काउंट आणि ईव्हीएम कंट्रोल युनिट काउंटमधील आकडेवारी समसमान आहे. त्यामध्ये, कोणतीही तफावत आढळलेली नाही. त्यामुळे, मतमोजणीच्या प्रक्रियेत निवडणूक आयोगाने घालून दिलेल्या सर्व नियमांचे व प्रक्रियेचे योग्य पालन करण्यात आले आहे, असे निवडणूक आयोगाने आज स्पष्ट केले आहे.