दिव्यातील मतदार याद्यांमध्ये घोळ
ठाणे : ठाणे महापालिका हद्दीतील दिवा शहरातील मतदार याद्यांमध्ये मोठ्या प्रमाणात घोळ असून एका प्रभागाचे सुमारे तीन हजार मतदार हे दुसऱ्या प्रभागातील नगरसेवक निवडणार असल्याची बाब उघडकीस आली आहे.
ठाणे महानगरपालिकेच्या अंतिम याद्या प्रसारित झाल्या असून दिवा विभागातील वार्ड क्रमांक 43, 44, 45 मधील याद्यांमध्ये मोठ्या प्रमाणात अनियमितता आढळून आलेली आहे. या संदर्भात दिवा भाजपने पत्रव्यवहार केला असून याबाबत महापालिकेने अद्याप कोणताही हस्तक्षेप केलेला नसून दोषी अधिकाऱ्यांवरही कोणतीही कारवाई केलेली नाही. या प्रकरणी संबंधित दोषी अधिकाऱ्यांवर कारवाई करण्याची मागणी भाजपाने केली आहे. वार्ड क्रमांक 43 मधील तीन ते चार हजार मतदार हे वार्ड क्रमांक 45 मध्ये टाकण्यात आले आहेत. ही लोकशाहीची चेष्टा आहे. भाजपच्या वतीने या बाबतची तक्रार मुख्य निवडणूक आयुक्तांकडे देण्यात आली आहे. यावेळी भाजपचे भटके विमुक्त आघाडीचे महाराष्ट्र प्रदेश सरचिटणीस शिवाजी आव्हाड आणि इतर पदाधिकारी उपस्थित होते.