कल्याण : रविवारपासून पडणार्‍या मुसळधार पावसानेच सोमवारीही आपला जोर कायम ठेवला आहे. सकाळपासून पडणार्‍या जोरदार मूसळधार पावसामुळे कल्याण पूर्व भागातील ड प्रभाग समितीच्या मागच्या बाजूला असलेल्या हनुमाननगर नजीकचा टेकडीवरुन दरड कोसळल्याची घटना सोमवती सायंकाळी घडली.
टेकडीच्या पायथ्यापाशी असलेल्या बैठ्या घरांच्या जवळपास दरडीच मोठे दगड कोसळून पडले, मात्र सुदैवाने घटनेत घरांचे नुकसान व जीवितहानी टळली. महापालिकेच्या प्रभाग अधिकार्‍यांनी व आपतकालीन पथकाने घटनास्थळी धाव घेतली बचावकार्याला सुरुवात करीत टेकडीच्या आजूबाजूच्या परिसरातील नागरिकांना सुरक्षित ठिकाणी हलविण्यात आले.
कल्याण पूर्वेतील पालिकेच्या ड प्रभाग क्षेत्र कार्यालयाच्या मागच्या बाजूला व दुसर्‍या बाजुने हनुमानगरला लागून ही टेकडी वजा छोटा डोंगराचा भाग आहे. सोमवारी दुपारपासून मुसळधार पावसाने अधिकच जोर धरल्याने सायंकाळच्या सुमारास या छोट्या डोंगराच्या टेकडीच्या दरडीचा काही भाग कोसळला. कोसळलेल्या दरडीबरोबर मोठे दगड खाली आले. या टेकडीच्या पायथ्यापाशी बैठी घरे असून सुदैवाने या घरांवर दरड कोसळली नाही. या बैठ्या घरातील एकाही व्यक्तीला इजा झालेली नाही. या घटनेची माहीती मिळताच घटना स्थळी प्रभाग अधिकारी हेमा मुंबरकर यांनी धाव घेतली.
घटना घडलेल्या परिसरातील पाच कुटुंबियांना सुरक्षितस्थळी हलविण्यात आले आहे. या कुटुंबियांना राधाकृष्ण मंदिराच्या हॉलमध्ये राहण्याची व्यवस्था करण्यात आली आहे. त्यांच्या जेवण-पाण्याची व्यवस्था महापालिकेकडून उपलब्ध करुन देण्यात आली असल्याची माहिती प्रभाग अधिकारी मुंबरकर यांनी दिली आहे.