* लसी आणि औषधांचा पुरेसा साठा
* शिळ आणि कौसा येथे सापडले बाधित रुग्ण
* छत्रपती शिवाजी महाराज रुग्णालय आणि पार्किंग प्लाझा येथे विलगिकरण कक्ष
ठाणे : शिळ आणि कौसा या नागरी आरोग्य केंद्रांच्या अंतर्गत गोवर या आजाराचे बाधित सापडले आहेत. त्यामुळे, या दोन्ही आरोग्य केंद्रांच्या हद्दीत २४ तास आणि सातही दिवस घरोघरी जाऊन व्यापक सर्वेक्षण करण्याच्या सूचना देण्यात आल्याची माहिती ठाणे महापालिका आयुक्त अभिजीत बांगर यांनी दिली. ऑक्टोबर ते नोव्हेंबर या काळात, कौसा येथे पाच, शीळ येथे चार, मुंब्रा येथे दोन आणि एन एम गल्लीत दोन असे १३ गोवर बाधित सापडले आहेत.
गोवरची लक्षणे दिसू लागल्यापासून तो बरा होईपर्यंत दहा दिवसांचा कालावधी जातो. त्यामुळे, शिळ आणि कौसा आरोग्य केंद्रात पाच दिवसात सर्वेक्षण पूर्ण करून, दुसरी फेरी लगेच पुढील पाच दिवसात पूर्ण करावी. जेणेकरून सर्व संशयित बालके शोधून उपचार करणे शक्य होईल आणि संसर्गाची साखळी तोडणे शक्य होईल, असे आयुक्त श्री. बांगर यांनी स्पष्ट केले.
अजूनही ज्या बालकांनी लस घेतली नसेल त्यांचे पालकांनी त्यांना लसीकरण करून घ्यावे. लस घेतलेल्या बालकांना गोवर होत नाही. अपवादाने झालाच तर कोणत्याही धोक्याशिवाय बालक बरे होते. म्हणून लसीकरण आवश्यक असल्याचा पुनरुच्चार आयुक्त बांगर यांनी केला.
स्थानिक भागात काम करणारे सर्व खाजगी डॉक्टर आणि नागरी आरोग्य केंद्राचे वैद्यकिय अधिकारी यांचा व्हॉट्सॲप ग्रुप बनविण्याच्या सूचना देण्यात आल्या आहेत. संबंधित डॉक्टरांनी त्यांच्याकडे उपचारासाठी आलेल्या गोवर सदृश लक्षणे असणाऱ्या रुग्णाच्या नातेवाईकांचा नंबर नोंदवून तो तत्काळ व्हॉट्सॲप ग्रुपवर देणे बंधनकारक आहे. याच ग्रूपवर उपचार, औषधे याबद्दल मार्गदर्शन केले जाईल, असे आयुक्त श्री. बांगर यांनी नमूद केले.
छत्रपती शिवाजी महाराज रुग्णालय येथे विलगीकरण कक्ष सुरू करण्यात आला आहे. आवश्यकता भासल्यास पार्किंग प्लाझा येथेही विलगीकरण कक्ष तयार आहे.
खाटा, औषधोपचार यांची कोणतीही कमतरता भासणार याची काळजी घेतली जात आहे. सर्वेक्षणाचे काम २४ तास आणि सातही दिवस सुरू राहील. त्यात खंड पडणार नाही.
गोवरची लक्षणे
ताप, सर्दी, खोकला, डोळे लाल होणे, घशात दुखणे, अशक्तपणा, अंग दुखणे, तोंडाच्या आतील बाजूस पांढऱ्या रंगाचे चट्टे दिसणे अशी लक्षणे आढळल्यास डॉक्टरांच्या सल्ल्यानुसार औषधे घ्या.