वाहतूक नियोजनासाठी १५० कर्मचारी २४ तास तैनात
ठाणे: निळजे रेल्वे उड्डाण पुलाच्या पुनर्बांधणीचे काम उद्या ५ फेब्रुवारीपासून १० फेब्रुवारी या कालावधीत घेण्यात येणार असून यासाठी शिळफाटा पलावा चौक वाहतुकीसाठी पूर्णपणे बंद ठेवण्यात येणार आहे. आधीच या पट्ट्यात मोठ्या प्रमाणात वाहतूक कोंडी होत असून या कामामुळे होणाऱ्या वाहतूक कोंडीचे नियोजन करण्यासाठी तब्बल १५० वाहतूक कर्मचारी २४ तास तैनात राहणार आहेत.
शिळफाटा रस्त्यावरील निळजे रेल्वे उड्डाणपुलाच्या कामासाठी पाच दिवस पलावा चौकाकडे जाणारी वाहतूक बंद राहणार आहे. त्यामुळे वाहनचालकांना शिळफाटा रस्ता दिशेने न येता अधिकाधिक पर्यायी रस्त्यांच्या मार्गांचा अवलंब करावा लागणार आहे. त्याचप्रमाणे जड, अवजड वाहनांना देखील शिळफाटा सोडून बाहेरील मार्गांचा अवलंब करण्याचे आवाहन वाहतूक पोलिसांच्या वतीने करण्यात आले आहे. या काळात मोठ्या प्रमाणात वाहतूक कोंडी होण्याची शक्यता असून यासाठी यासंदर्भात एक महत्वाची बैठक सोमवरो संपन्न झाली. यामध्ये वाहतुकीचे नियोजन करण्यासाठी वाहतूक पोलिसांकडून वाहतुकीचे नियोजन करण्यात आले आहे.
शिळफाटा रस्ता बंदचा प्रवाशांना त्रास होऊ नये, पर्यायी रस्ते मार्गावरील वाहतूक नियोजन विषयावर चर्चा करण्यात आली. पोलीस उपायुक्त पंकज शिरसाट, कल्याण, मुंब्रा वाहतूक विभागाचे साहाय्यक पोलीस आयुक्त, मानपाडा पोलीस ठाण्याचे वरिष्ठ पोलीस निरीक्षक विजय कादबाने, कोळसेवाडी, डोंबिवली वाहतूक विभागाचे सर्व कर्मचारी, अधिकारी पाच दिवस शिळफाटा वाहतूक बंदीचा कोणाही प्रवाशाला वाहतूक कोंडीच्या माध्यमातून त्रास होऊ नये म्हणून स्वता तैनात असणार आहेत.
शिळफाटा रस्त्यासह संलग्न पर्यायी आठ ते दहा रस्त्यांवर वाहतूक पोलीस, अधिकारी दिवस, रात्र तैनात असणार आहेत. पोलीस उपायुक्त पंकज शिरसाट स्वतः वाहतूक नियोजनावर लक्ष ठेवणार आहेत. एक सहाय्यक पोलीस आयुक्त, एक पोलीस निरीक्षक, आठ पोलीस उपनिरीक्षक, ६० अंमलदार, पुलाचे काम करणाऱ्या टाटा कंंपनीकडून ६० वाहतूक सेवक उपलब्ध होणार आहेत. यामधील ३० वाहतूक सेवक कोळसेवाडी वाहतूक, ३० मुंब्रा वाहतूक हद्दीत तैनात असणार आहेत. मानपाडा पोलीस ठाण्याचे वरिष्ठ पोलीस निरीक्षक विजय कादबाने यांच्यासह मानपाडा पोलीस वाहतूक नियोजनासाठी सहकार्य करणार आहेत. पाच पोलीस उपनिरीक्षक बाहेरून बंदोबस्तासाठी मागविले जाणार आहेत.
शिळफाटा रस्ता बंद असल्याने प्रवाशांनी शिळफाटा रस्ता दिशेने न येता अधिकाधिक पर्यायी रस्ते मार्गाचा अवलंब करावा. शिळफाटा बंदच्या कालावधीत कोंडी मुक्त रस्ते राहतील यासाठी प्रयत्न करावेत. जड, अवजड वाहन चालकांनी शिळफाटा सोडून बाहेरील महामार्ग, रस्त्यांचा अवलंब करावा असे आवाहन वाहतूक पोलिसांच्या वतीने करण्यात आले आहे.