ठाणे : ठाणे महानगरपालिकेच्या माध्यमातून संपूर्ण महापालिका क्षेत्रात 2022-23 या आर्थिक वर्षात आतापर्यंत एकूण अंदाजे चार टन प्रतिबंधीत प्लास्टिक जप्त करण्यात आले असून एकूण 12 लाख 25,900 रुपयांचा दंड वसुल करण्यात आला आहे. ही कारवाई सुरूच राहणार असून नागरिकांनी प्रतिबंधित प्लास्टिकचा वापर टाळून इतर पर्यायी वस्तूंचा वापर करावा व ठाणे शहर प्लास्टिकमुक्त करण्याकरिता महापालिकेस सहकार्य करावे,असे आवाहन महापालिका आयुक्त अभिजीत बांगर यांनी केले आहे.
जप्त केलेल्या प्लास्टिकमध्ये मुख्यत: कटलरी वस्तू (प्लेट, कप, ग्लासेस, काटे, चमचे, चाकू, ट्रे ) पॅकेजिंग/ रॅपिंग फिल्म्स (स्वीट बॉक्स, आमंत्रण पत्रिका, सिगारेटची पाकिटे), पीव्हीसी बॅनर, सजावटीसाठी लागणारे पॉलिस्टीरिन, प्लास्टिक कॅरीबॅग, न विणलेल्या प्लास्टिक कॅरी बॅग, प्लास्टिक शीट (50 मायक्रॉनपेक्षा जास्त जाडी) इत्यादींचा समावेश आहे.
ठाणे महानगरपालिका क्षेत्रातील 5000 आस्थापनांना भेटी देऊन नौपाडा-कोपरी प्रभाग समिती येथून एकूण 3200 किलो प्लास्टिक, दिवा प्रभाग समिती कार्यक्षेत्रात 450 किलो प्लास्टिक, माजिवडा- मानपाडा प्रभाग समिती कार्यक्षेत्रातून एकूण 3190 किलो प्लास्टिक, वागळे इस्टेट प्रभाग समितीमधून एकूण 455 किलो प्लास्टिक, वर्तकनगर प्रभाग समितीमधून एकूण 350 किलो प्लास्टिक, कळवा प्रभाग समिती येथून एकूण 3070 किलो प्लास्टिक, उथळसर प्रभाग समिती येथून 120 किला प्लास्टिक जप्त करुन दंडात्मक कारवाई करण्यात आली. सदरची कारवाई ही महापालिकेचे प्रदुषण नियंत्रण विभाग व घनकचरा विभागाच्या माध्यमातून संयुक्तरित्या करण्यात आली.
महाराष्ट्र प्रदुषण नियंत्रण मंडळाची विशेष मोहिम
मंगळवार 27 डिसेंबर 2022 पासून केंद्रीय प्रदुषण नियंत्रण मंडळाच्या निर्देशानुसार महाराष्ट्र प्रदुषण नियंत्रण मंडळ व ठाणे महानगरपालिका प्रदुषण नियंत्रण विभागाद्वारे संयुक्तपणे माजिवडा मानपाडा प्रभाग समिती क्षेत्रात प्रतिबंधित प्लास्टिक व सिंगल यूज प्लास्टिक बंदीबाबत मोहिम हाती घेण्यात आली आहे. या मोहिमेअंतर्गत आतापर्यंत 310 किलो प्रतिबंधित प्लास्टिक जप्ती व रुपये 40 हजार इतकी दंड वसुली करण्यात आली.