पोलादपूर : गेल्यावर्षी दुर्घटनेनंतर साक्षीवर मुंबईतील केईएम रुग्णालयात उपचार करण्यात आले. यावेळी नगरविकास मंत्री एकनाथ शिंदे यांनी रुग्णालयात भेट घेऊन साक्षीच्या उपचारासाठी पाच लाख रुपयांची थेट आर्थिक मदत केली होती. त्यावेळी श्री. शिंदे यांनी अत्याधुनिक तंत्रज्ञानावर आधारित कृत्रिम पाय बसविण्याच्या डॉक्टरांना सूचना दिल्या होत्या. त्याअनुषंगाने आज एकनाथ शिंदे यांच्या हस्ते साक्षी दाभेकर हिला अत्याधुनिक कृत्रिम पाय बसविण्यात आला. त्यातून साक्षीच्या चेहऱ्यावर एकच स्मितहास्य उमटले.
डॉ अंकुश सेठ यांच्या टीमने शिवसेना वैद्यकीय मदत कक्षाच्या आणि डॉ. श्रीकांत शिंदे फाउंडेशनच्या माध्यमातून अत्याधुनिक कृत्रिम पाय साक्षीला बसविण्यात आला.
चिमुरड्याला वाचविण्याऱ्या साक्षीची ही कामगिरी धाडसी व अतुलनीय आहे. राष्ट्रपती बाल शौर्य पुरस्कारासाठी दिल्लीत पाठपुरावा करणार असल्याचे खासदार डॉ.श्रीकांत शिंदे यांनी सांगितले.
पूरस्थितीत पोलादपूर तालुक्यातील केवनाळे गावात चिमुरड्या मुलाला वाचवताना भिंत अंगावर कोसळून साक्षी दाभेकर (१४) ही क्रीडापटू जबर जखमी झाली होती. तिला तातडीने मुंबईत हलवून ‘केईएम’मध्ये डाव्या पायावर शस्त्रक्रिया त्याला गुडघ्यापासून खाली कापावा लागला होता. या मुलीची घरची आर्थिक स्थिती बेताची असल्याने पुढील उपचाराच्या लाखो रुपयांच्या खर्चाचा प्रश्न उभा राहिला होता. त्या पार्श्वभूमीवर नगरविकास मंत्री एकनाथ शिंदे यांनी डॉ श्रीकांत शिंदे फाऊंडेशन आणि शिवसेना वैद्यकीय मदत कक्षाच्या माध्यमातून ही जबाबदारी उचलली.
साक्षीचे ऑलम्पिकमध्ये धावण्याचे स्वप्न असून या स्वप्नपूर्तीसाठी डॉ श्रीकांत शिंदे फाऊंडेशन सर्वोतोपरी मदत करणार असल्याचे खासदार डॉ.श्रीकांत शिंदे यांनी सांगितले.