मुंबई : मुंबई महानगर प्रदेश विकास प्राधिकरणाच्या (एमएमआरडीए) मुंबई महानगर प्रदेशातील मेट्रो प्रकल्पांना आता युके सरकारच्या वाहतूक खात्याअंतर्गत येणाऱ्या क्राॅसरेल इंटरनॅशनलचे बळ मिळाले आहे.
दावोसमध्ये एमएमआरडीए आणि क्राॅसरेल इंटरनॅशनलमध्ये मेट्रो प्रकल्पातील कार्यप्रणाली, देखभाल सुरक्षा यासह अन्य कामे आणि सेवांकरीता मदतीचा हात देण्यासाठी सांमजस्य करार करण्यात आला होता. त्यानुसार आता क्राॅसरेल आणि एमएमआरडीएने कामास सुरुवात केली आहे.
एमएमआरडीए एमएमआरमध्ये ३३७ किमी लांबीचे मेट्रोचे जाळे विणत आहे. सध्या ३३७ किमीपैकी मुंबईत अंदाजे ५९ किमी लांबीच्या मेट्रो मार्गिका वाहतूक सेवेत दाखल झाल्या आहेत. यात मेट्रो १ (घाटकोपर-अंधेरी-वर्सोवा), मेट्रो २ अ (दहिसर-अंधेरी प.), मेट्रो ३ (आरे-बीकेसी), मेट्रो ७ (दहिसर-गुंदवली) या मार्गिकांचा यात समावेश आहे. येत्या एक-दोन वर्षात आणखी काही मार्गिका वाहतूक सेवेत दाखल होणार आहेत.
मेट्रो सेवा ही वाहतुकीचा कार्यक्षम पर्याय ठरावा यासाठी एमएमआरडीएकडून मेट्रो प्रकल्पातील विविध सुविधांना बळकटी देण्याचा प्रयत्न सुरू आहे. त्याचाच भाग म्हणून नुकत्याच झालेल्या दावोसमधील वर्ल्ड इकाॅनाॅनिक फोरम २०२५ मध्ये एमएमआरडीए आणि क्राॅसरेलमध्ये एक सांमजस्य करार झाला. या करारानुसार युकेमधील क्राॅसरेल इंटरनॅशनल एमएमआरमधील मेट्रो प्रकल्पांमधील विविध सेवांसाठी आवश्यक ती मदत करणार आहे. विविध सेवांना बळकटी देण्याच्या दृष्टीने क्राॅसरेल एमएमआरडीएला सहकार्य करणार आहे. मेट्रो प्रकल्पातील कार्यप्रणाली, देखभाल, सुरक्षा, डिजिटल परिवर्तन या सेवा आणखी मजबूत करून मेट्रो वाहतूक कार्यक्षम करण्यासाठी आता क्राॅसरेलची मदत होणार आहे. क्राॅसरेलकडून आता प्रत्यक्ष कामास सुरुवात झाल्याची माहिती महानगर आयुक्त डाॅ. संजय मुखर्जी यांनी दिली.
डॉ. मुखर्जी यांच्या अध्यक्षतेखाली नुकतीच एक बैठक पार पडली असून यात युकेचा वाहतूक विभाग आणि क्राॅसरेल इंटरनॅशनलमधील तज्ज्ञांचा समावेश होता. यावेळी मेट्रो प्रकल्पातील विविध सेवांना बळकटी देण्याच्यादृष्टीने अनेक विषयांवर चर्चा झाल्याचेही डॉ. मुखर्जी यांनी स्पष्ट केले. आता प्रत्यक्ष कामाला सुरुवात झाल्याने येत्या काळात एमएमआरमधील मेट्रोची वाहतूक नक्कीच एक कार्यक्षम, मजबूत वाहतूक पर्याय म्हणून ओखळला जाईल, असा विश्वासही यानिमित्ताने व्यक्त केला आहे.
