ठाणे : गणेशोत्सवाच्या पार्श्वभूमीवर ठाणे महापालिका कार्यक्षेत्रातील सर्व सार्वजनिक नवरात्रौत्सव मंडळांना संपूर्णत: भाडेमाफी द्यावी, अशी मागणी ठाण्याचे माजी महापौर व शिवसेना प्रवक्ते नरेश म्हस्के यांनी महापालिका आयुक्त डॉ. विपीन शर्मा यांच्याकडे केली होती. त्यानुसार आयुक्तांनी भाडे माफ करण्याचा निर्णय घेतला.
मागील दोन वर्षे कोरोनाचा काळ असल्यामुळे बहुतांशी सार्वजनिक मंडळे आर्थिक विवंचनेत आहेत. सर्व सार्वजनिक मंडळे सामाजिक उपक्रम राबवत असतात. या मंडळांचा शहराच्या जडणघडणीत मोलाचा सहभाग नेहमीच असतो. सामाजिक बांधिलकी जपत ही मंडळे गेली अनेक वर्षे काम करीत आहेत, या मंडळांना दिलासा मिळावा या दृष्टीकोनातून राज्याचे मुख्यमंत्री एकनाथ शिंदे यांनी सार्वजनिक गणेशोत्सव मंडळांचे संपूर्ण भाडे माफ केले होते, यामुळे सार्वजनिक मंडळांना निश्चितच दिलासा मिळाला आहे. याच धर्तीवर सार्वजनिक नवरात्रौत्सव मंडळांना देखील संपूर्ण भाडे माफी द्यावी अशी मागणी महापालिका आयुक्त डॉ. विपिन शर्मा यांच्याकडे केल्यावर त्यांनी सार्वजनिक नवरात्रौत्सव मंडळांचे भाडे माफ करावे असे आदेश सर्व संबंधितांना दिले आहेत.
या निर्णयामुळे सार्वजनिक नवरात्रौत्सव मंडळांना देखील दिलासा मिळणार आहे. सर्व मंडळांनी महापालिकेने आखून दिलेल्या नियमांचे पालन करुन नवरात्रौत्सव साजरा करावा, असे आवाहन माजी महापौर व शिवसेना प्रवक्ता नरेश म्हस्के यांनी केले आहे.