कल्याण : अतिवृष्टीमुळे गाळे पाण्याखाली गेले त्यामुळे झालेल्या नुकसानाचे मोबदला मिळवून देण्यासाठी तलाठ्याने १५ हजार रुपयांची मागणी केली होती. तेच पंधरा हजार घेताना ठाणे लाच लुचपत प्रतिबंधक विभागाने एक खासगी इसम अनंता कंटे यास अटक केली आहे. अनंता तलाठी अमृता बडगुजर यांचा खासगी कर्मचारी होता. या प्रकरणात तलाठी अमृता बडगुजर यांना सुद्धा आरोपी करण्यात आले असून त्यांचा शोध सुरू केला आहे.
कल्याण तालुक्यातील कांबा परिसरात अतिवृष्टीमुळे शेतकऱ्याचे शेतीचे आणि दुकानदारांचे दुकानाचे नुकसान झाले होते. सरकारकडून या ठिकाणी पंचनामे केले होते. कल्याण तहसील कार्यालयाने हे पंचनामे केले होते. ज्या लोकांचे नुकसान झाले होते, त्यांना मोबदला देण्यात आला होता. कांबा परिसरातील एका व्यक्तीच्या गाळ्याचे नुकसान झाले. या व्यक्तिला पंचनाम्यानंतर मोबदला मंजूर झाला. हा मोबदला मिळवून देण्याच्या बदल्यात कल्याण तहसील कार्यालयातील महिला तलाठीने १५ हजार रुपये मागितले होते. या पैशाची तडजोड कांबा येथे राहणाऱ्या अनंत कंटे या व्यक्तिने केली होती.
कंटे हा कल्याण पश्चिमेतील तलाठी कार्यालयात काम करतो. तो एक खासगी इसम आहे. तो सरकारी कामात मध्यस्थी करतो. याबाबत तक्रारदार कंटे यांनी ठाणे लाच लुचपत प्रतिबंधक कार्यालयास माहिती दिली होती. या विभागाच्या पथकाने आज कार्यालयात सापळा रचला व चिकणघर येथील तलाठी कार्यालयात १५ हजार रुपये घेताना अनंत कंटे याला ताब्यात घेतले. कंटे याने महिला तलाठी अमृता बडगुजर हिच्यासाठी पैसे मागितल्याचे निष्पन्न झाले. एसीबीने कंटेला ताब्यात घेत अमृता बडगुजर यांचा शोध सुरु केला आहे.