मनसे नेत्याचचे खोचक आणि खुले पत्र
नवी मुंबई: नवी मुंबईचे मनसे शहर अध्यक्ष गजानन काळे यांनी उद्धव ठाकरे यांना खोचक पत्र लिहिले आहे. आपली राजकीय भूमिका कधीही न बदलल्याबद्दल तुम्हाला दुग्धाभिषेक करायचा आहे. त्यासाठी वेळ मिळावा, असा टोला पत्राच्या माध्यमातून काळेंनी लगावला आहे. विशेष म्हणजे काळेंनी पत्राच्या सुरुवातीला ठाकरेंचा उल्लेख शिल्लक सेना प्रमुख असा केला आहे.
उद्धव ठाकरेंना लिहिलेल्या पत्रात गजानन काळेंनी खोचक टोले लगावले आहेत. ‘आमदार आदरणीय उद्धवजी ठाकरे आपण शिवसेनेची धुरा हातात घेतल्यापासून (माफ करा आत्ताचा आपला उबाठा गट) कधीही सेनेच्या भूमिकेला छेद देऊन राजकारण केलेले नाही. मंत्रीपद, सत्ता, मुख्यमंत्री पद (स्वतःला) यासाठी आपण कधी भाजपाबरोबर युती केली तर कधी युती तोडली. नंतर आपल्याला मुख्यमंत्री पद मिळत नाही हे लक्षात आल्यानंतर आपण सेनेचे पारंपरिक शत्रू असलेले आणि संपूर्णतः विरोधी विचारधारा असलेल्या कॉंग्रेस आणि राष्ट्रवादी (म्हणजे आत्ताचा शरद पवार गट) बरोबर आघाडी केलीत. मात्र सेनेला मुख्यमंत्री पद मिळवून दिलेच. हा भाग वेगळा की आपण एका सर्वसामान्य शिवसैनिकाला मुख्यमंत्री करणार होतात पण माफ करा आम्ही विसरलोच की आपणही एक शिवसैनिकच आहात. हे सगळे आपण केलेत यास कुठेही यू टर्न, तडजोडीचे, सत्तापिपासू, स्वार्थी, मतलबी राजकारण अथवा भूमिका बदलणे असे म्हणता येत नाही. याबद्दल आपले करावे तितके कौतुक कमीच आहे,’ असे चिमटे काळेंनी पत्रातून काढले आहेत.
‘आपल्यासारखा इतका सच्चा, प्रामाणिक, तत्वनिष्ठ, सज्जन, साधा, भोळा आणि सत्तेचा अजिबात मोह नसलेला व्यक्ती आजच्या राजकारणातच काय तर या पृथ्वीतलावर सापडणे दुर्मिळ. याच आपल्या गुणांसाठी, तुमचे महाराष्ट्रावर असलेले ऋण फेडण्यासाठी कृतज्ञता म्हणून आम्ही समस्त महाराष्ट्राच्यावतीने आपला दुधाने अभिषेक करू इच्छितो (जसा नायक सिनेमात अनिल कपूर यांचा केला गेला होता) तरी आपण आमच्यासारख्या सामान्य कार्यकर्त्यांना यासाठी आपली वेळ द्यावी, अशी विनंती काळेंनी उद्धव ठाकरे यांना केली आहे. निवडणुकांच्या आपल्या व्यस्त दिनक्रमात आपण वेळ न देऊ शकल्यास आपल्या फोटोला आम्ही दुधाने अभिषेक घालून समस्त महाराष्ट्राची इच्छा पूर्ण करुच, असेही काळेंनी पत्राच्या शेवटी नमूद केले आहे.