एकनाथ शिंदे यांची प्रतिक्रिया
ठाणे : शिवसेना नेते आणि खासदार संजय राऊत यांनी बंडखोर आमदारांवर केलेल्या वक्तव्यावर आता एकनाथ शिंदे यांनी आपली ट्विट करत प्रतिक्रिया दिली आहे. ते म्हणाले, बाळासाहेबांची शिवसेना वाचवण्यासाठी मरण आलं तरी बेहत्तर.
एकनाथ शिंदे ट्वीट करत म्हणाले आहेत की, ”मुंबई बॉम्बस्फोट घडवून निष्पाप मुंबईकरांचा जीव घेणाऱ्या दाऊदशी थेट संबंध असणाऱ्यांना हिंदुहृदयसम्राट वंदनीय बाळासाहेब ठाकरे यांची शिवसेना समर्थन कशी करू शकते? यालाच विरोध म्हणून उचललेलं हे पाऊल. आम्हा सर्वांना मृत्यूच्या दारात घेऊन गेले तरी बेहत्तर.” शिंदे यांनी ट्वीट करत संजय राऊत यांनाही टॅग केलं आहे. तसेच त्यांनी या ट्विटसह #MiShivsainik हे हॅशटॅग ही जोडले आहे.
दहिसर येथील शिवसेनेच्या मेळाव्यात मार्गदर्शन करताना संजय राऊत म्हणाले होते की, ”40 आमदारांचे मृतदेह थेट गुवाहाटीमधून येतील. त्यांना थेट शवागृहात पोस्टमोर्टमसाठी पाठवू. गुवाहाटीमध्ये एक मंदिर आहे. या मंदिरात रेड्याचा बळी दिला जातो. आम्ही 40 रेडे पाठवले आहेत.” राऊत यांनी केलेल्या याच वादग्रस्त वक्तव्यावर एकनाथ शिंदे यांनी ट्वीट केले आहे.