भाजपाला २४ ते २५ तर शिंदे गटाला १५ ते १६ मंत्रिपदे
मुंबई : महाराष्ट्राचे मुख्यमंत्री एकनाथ शिंदे यांच्या मंत्रिमंडळाच्या विस्ताराबाबत मोठी माहिती समोर येत आहे. मंत्रिमंडळ विस्ताराबाबत एकनाथ शिंदे गट आणि भाजपमध्ये सहमती झाल्याची माहिती सूत्रांनी दिली आहे.
महाराष्ट्रात ३० जून रोजी एकनाथ शिंदे यांनी मुख्यमंत्री आणि देवेंद्र फडणवीस यांनी उपमुख्यमंत्री म्हणून शपथ घेतली. दोन्ही नेत्यांच्या शपथविधीला एक महिना पूर्ण होत असताना देखील मंत्रिमंडळ विस्तार झालेला नाही, यामुळं विरोधी पक्षांनी प्रश्न उपस्थित केले होते. मुख्यमंत्री एकनाथ शिंदे आणि भाजपमध्ये मंत्रिमंडळ विस्ताराचा फॉर्म्युला निश्चित होत नसल्याच्या चर्चा सुरु होत्या. एकनाथ शिंदे गट आणि भाजपमध्ये मंत्रिमंडळ विस्तारामध्ये ३५-६५ असा फॉर्म्युला ठरल्याचं सूत्रांनी सांगितलं आहे.
भाजपकडे अपक्षांसह ११३ आमदारांचं पाठबळ आहे. तर एकनाथ शिंदे यांच्यासोबत ५० आमदार आहेत. राज्य सरकार स्थापन होऊन देखील मंत्रिमंडळ विस्तारात दोन्ही गटांना किती पदं मिळणार याबाबत साशंकता होती. भाजपला २४ ते २५ मंत्रिपदं तर एकनाथ शिंदे यांच्या गटाला १५ ते १६ मंत्रिपदं मिळणार असल्याची माहिती सूत्रांकडून देण्यात आली आहे.
एकनाथ शिंदे यांच्या सरकारला पाठिंबा देणाऱ्या अपक्षांना देखील मंत्रिमंडळात स्थान दिलं जाऊ शकतं, अशी माहिती सूत्रांनी दिली आहे. एकनाथ शिंदे यांच्यासोबत ८ ते ९ अपक्ष आमदार आहेत. तर, भाजपसोबत देखील ५ ते ६ अपक्ष आमदार आहेत.
उद्धव ठाकरे यांच्या मंत्रिमंडळात सहभागी असलेल्या नऊ मंत्र्यांनी एकनाथ शिंदे यांच्या गटात जाण्याचा निर्णय घेतला होता. एकनाथ शिंदे यांच्यासह संदिपान भुमरे, गुलाबराव पाटील, दादा भुसे, उदय सामंत, शंभूराज देसाई, अब्दुल सत्तार, बच्चू कडू, राजेंद्र पाटील यड्रावकर यांनी महाविकास आघाडी सरकार विरोधात भूमिका घेतली होती. या नेत्यांना शिंदे गटातून पुन्हा संधी मिळू शकते, असं बोललं जात आहे. एकनाथ शिंदे यांच्या सरकारला पाठिंबा देणाऱ्या शिंदे समर्थक आमदारांपैकी अन्य नेत्यांनी देखील मंत्रिपदासाठी दावेदारी सांगितली आहे. त्यामुळं शिंदे गट कुणाला संधी देणार हे पाहावं लागणार आहे.