*नामकरणानंतरही तलाव बंद
* प्रशासनाच्या ढिसाळ कारभाराविरोधात मनसे आक्रमक
ठाणे : वर्तकनगर प्रभाग समिती क्षेत्रातील लोकमान्य पाडा नं. 1, आकृती गृहसंकुलाच्या भुखंडावर बांधण्यात आलेल्या तरण तलावाचे नामकरण करून अडीच वर्ष लोटले तरीही हा तरण तलाव नागरिकांसाठी खुला करण्यात आलेला नाही. प्रशासनाच्या या ढिसाळ कारभाराबाबत आक्रमक होत याप्रश्नी ठाणे पालिका आयुक्तांना मनसेच्या वतीने निवेदन देण्यात आले आहे.
वर्तकनगर प्रभाग समितीच्या अंतर्गत येणाऱ्या या तलावाचे ”स्व. रामचंद्र ठाकुर तरण तलाव” असे नामकरण करण्यात आले होते. 2019 ला विधानसभा निवडणुकीच्या तोंडावर मतदारांना आकर्षित करण्यासाठी नामकरण करण्यात आले. वर्तकनगर, लोकमान्य नगर, शिवाई नगर, शास्त्रीनगर, चिराग नगर, भिमनगर या आजूबाजूच्या परिसरातील नागरिकांना या तरण तलावाचा आजतागायत लाभ घेता आलेला नाही.
ठाणे महानगरपालिकेच्या क्रीडा विभागाकडे वारंवार पाठपुरावा करुनही तरण तलाव सर्वसामान्यांना खुला करण्यात आलेला नाही. वास्तु बंद असल्यामुळे योग्य निगा राखली जात नाही. तरी तात्काळ या विषयात गांभीर्याने लक्ष घालत व संबंधित विभागाला तलाव खुला करण्याचे आदेश द्यावेत, अशी मागणी महाराष्ट्र नवनिर्माण सेनेचे विभाग अध्यक्ष संदीप पाचंगे यांनी दिलेल्या निवेदनात केली आहे.
वर्तकनगर प्रभाग समिती अंतर्गत अशाच पध्दतीने अनेक वास्तूंचे केवळ अनावरण केले जाते. त्यानंतर या वास्तू धूळखात पडण्याची मोठी मालिकाच या समिती परिसरात दिसून येते. त्यामुळे या वास्तूंचे अनावरण होताच त्या नागरिकांसाठी खुल्या कराव्यात. जेणेकरून सर्वसामान्यांना त्याचा वापर करता येईल, असे संदीप पाचंगे यांनी सांगितले.