शिवमंदिर आर्ट फेस्टिवलला अभूतपूर्व गर्दी
अंबरनाथ: प्रसिद्ध गायक आणि संगीतकार शंकर महादेवन यांच्या सुरेल स्वरांनी हजारो रसिक मंत्रमुग्ध झाले.
लोक कलेचे अभ्यासक आणि सादरकर्ते डॉ. गणेश चंदनशिवे, मैथिली ठाकूर आणि शिवम महादेवन यांच्या गायनाने संगीतमय वातावरणात पारंपरिक, बॉलीवुड, भक्ती संगीत अशा अनेक संगीत छटावर रसिकांनी ठेका धरत उत्स्फूर्त दाद दिली.
अंबरनाथ येथील प्राचीन शिवमंदिराच्या प्रांगणात डॉ.श्रीकांत शिंदे फाऊंडेशनच्या वतीने आयोजित करण्यात आलेल्या शिव मंदिर आर्ट फेस्टिवलला गेल्या तीन दिवसांपासून कलाप्रिय प्रेक्षकांकडून अभूतपूर्व असा प्रतिसाद मिळाला.
रविवार १९ मार्चला शंकर महादेवन यांना ऐकण्यासाठी रसिकांनी तुफान गर्दी केली. कार्यक्रम सायंकाळी सात वाजता होणार होता, मात्र रसिकांनी दुपारी तीन वाजल्यापासूनच कार्यक्रम स्थळी गर्दी करण्यास सुरुवात केली होती. त्यामुळे दुपारीच कार्यक्रम हाऊसफुल्ल झाला. यानंतर मिळेल त्या ठिकाणी उभे राहून प्रेक्षकांनी कार्यक्रमाचा आनंद घेतला. अभिनेता सुनील शेट्टी यांनीही कार्यक्रमाला उपस्थिती लावली होती.
गायक शंकर महादेवन यांनी ‘वक्रतुंड महाकाय सूर्यकोटी समप्रभ’ मंत्रोच्चाराने संगीत मैफलीची सुरुवात केली. यानंतर लोककलेचे अभ्यासक प्रा.डॉ. गणेश चंदनशिवे यांच्या पहाडी आवाजातील पारंपरिक गाण्याचे सादरीकरण झाले. डॉ. गणेश चंदनशिवे आणि शंकर महादेवन यांनी गणनायक गण दैवताय, गोंधळ गीत, पयल नमन, शिव तांडव स्त्रोत्र अशी गाणी सादर केली. या गाण्यांनंतर रंगलेल्या मैफलीत सुर निरागस हो गाण्याने शंकर महादेवन यांनी मैफलीत सुरांचे रंग भरले तर करोना काळात काम करणाऱ्या सर्व अत्यावश्यक सेवेतील योध्यांसाठी ‘लक्ष्य जो हर हाल मे पाना हैं’ गाणे गायले. यावेळी सुप्रसिध्द युवा गायिका मैथिली ठाकूर आणि शिवम महादेवन यांनीही गाणी गायली. प्रेक्षक ज्याची आतुरतेने वाट पहात होते असे ब्रेथलेस सादर करून रसिकांना मंत्रमुग्ध केले. यंदा या महोत्सवाला ‘सोशल मीडिया इन्फ्लुएन्सर्स’ अथर्व सुदामे, डॅनी पंडित, आर्यक पाठक, अंकिता वालावलकर यांनी महोत्सवाला उपस्थित राहून रसिक प्रेक्षकांचे मनोरंजन केले.
शंकर महादेवन यांनी गायलेले मेरी माँ गाणे कायमच प्रेक्षकांच्या मनाचा ठाव घेत त्यांना भावूक करते. शिव मंदिर आर्ट फेस्टीवल मध्येही या गाण्याच्या सादरीकरणानंतर खासदार डॉ. श्रीकांत शिंदे त्यांच्या आई लताताई शिंदे आणि पत्नी वृषाली श्रीकांत शिंदे यांच्या समवेत काही काळ भावूक झालेले दिसले.
आमदार प्रकाश सुर्वे, आमदार किसन कथोरे, मुंबईचे पोलीस आयुक्त विवेक फणसळकर, ठाणे पोलीस आयुक्त जयजीत सिंग, आदी यावेळी उपस्थित होते.