ठाणे : ‘महावितरण’च्या ठाणे परिमंडळातील असंख्य वीजग्राहक वीज देयके जमा करण्यासाठी चालढकल करत असताना कल्याण परिमंडळात मात्र, मार्च महिन्यात आतापर्यंत जवळपास १५ लाख ८६ हजार लघूदाब ग्राहकांनी वीजबिलाच्या २८८ कोटी रुपयांचा ऑनलाईन भरणा केला आहे. भरणा झाला असला तरीही विद्यमान आर्थिक वर्षातील वीज देयकांचे १३८ कोटी रुपये अजूनही वसूल होणे बाकी आहेत.
ग्राहकांना ऑनलाईन वीजबिल भरणा अधिक सुलभ व्हावा, यासाठी महावितरणने सुरक्षित असे विविध पर्याय उपलब्ध करून दिले आहेत. पुढील तीन दिवसांत अधिकाधिक ग्राहकांनी या सुविधेचा वापर करून चालू वीजबिल व थकबाकीचा भरणा करावा, असे आवाहन ‘महावितरण’ने केले आहे. महावितरणच्या www.mahadiscom.in या संकेतस्थळावर आणि ग्राहकांसाठी मोबाईल अ‍ॅपवर सर्व लघुदाब ग्राहकांना चालू व मागील वीज देयके पाहण्यासह व ती भरण्यासाठी नेटबँकिंग, क्रेडिट/डेबिट कार्डसह मोबाईल वॉलेट व कॅशकार्डचा पर्याय उपलब्ध आहे. बाजारात उपलब्ध असलेल्या विविध ‘पेमेंट अ‍ॅप’च्या माध्यमातून सुलभ व सुरक्षितपणे ऑनलाईन वीजबिल भरण्याची सुविधा आहे. ही सुविधा नि:शुल्क असून ऑनलाईन पेमेंटवर वीज देयकांमध्ये ५०० रुपयांच्या मर्यादेत ०.२५ टक्के सवलत देण्यात येत आहे.
कल्याण मंडळ एकमध्ये (कल्याण पूर्व आणि पश्चिम, डोंबिवली) चार लाख ३२ हजार ६७२ ग्राहकांनी ६७ कोटी ५३ लाख रुपये ऑनलाईन भरले असून १० कोटी ५० लाख रुपयांची थकबाकी आहे. कल्याण मंडळ दोनमधील (उल्हासनगर, बदलापूर, अंबरनाथ, शहापूर, मुरबाड) ३ लाख ९१ हजार ७५९ ग्राहकांनी ७१ कोटी ४६ लाख भरले असून ७१ कोटी ८१ लाखांची थकबाकी आहे. अन्य मंडळातील ग्राहकांची कोट्यवधी रुपयांची थकबाकी आहे.