मुंबई : महाराष्ट्र विधान परिषदेच्या पदवीधर आणि शिक्षक मतदारसंघाचे बिगुल वाजले आहे. राज्यातील शिक्षक आणि पदवीधर मतदारसंघासाठी निवडणूक जाहीर करण्यात आली असून 30 जानेवारी रोजी निवडणूक होणार आहे. तर, 2 फेब्रुवारी रोजी या निवडणुकीचा निकाल लागेल.
राज्यातील 2 पदवीधर आणि 3 शिक्षक मतदारसंघाच्या जागांसाठी निवडणूक होणार आहे. नाशिक, अमरावती पदवीधर तर नागपूर, औरंगाबाद आणि कोकण शिक्षक मतदारसंघात निवडणूक पार पडणार आहे. निवडणूक आयोगाने जाहीर केलेल्या निर्णयानुसार 12 जानेवारीपर्यंत उमेदवारी अर्ज दाखल करता येणार आहे. तर, 30 जानेवारीला मतदान आणि 2 फेब्रुवारीला निकाल जाहीर होईल.
नाशिक पदवीधर मतदारसंघात सुधीर तांबे (काँग्रेस), अमरावती पदवीधर मतदारसंघात रणजीत पाटील (भाजप), औरंगाबाद शिक्षक मतदारसंघात विक्रम काळे (राष्ट्रवादी), कोकण शिक्षक मतदारसंघात बाळाराम पाटील (अपक्ष) आणि नागपूर शिक्षक मतदार संघात नागो गाणार (अपक्ष) हे विद्यमान सदस्य आहेत.