शिवसेना माजी नगरसेवकासह दोन्ही गटातील सहा जणांवर गुन्हे दाखल
कल्याण : कल्याणजवळील वडवली गावात बांधकाम साईटवर मातीच्या भरणीच्या वादातून दोन गटात राडा झाला असून तलवारी बंदुकीने मारहाण करण्यात आली. या राड्यात तीन ते चार जण जखमी झाले. या प्रकरणी खडकपाडा पोलीसांनी मारहाण करणाऱ्या शिवसेना माजी नगरसेवकासह दोन्ही गटातील सहा जणांवर गुन्हे दाखल केले असून पुढील तपास सुरु केला आहे.
कल्याणजवळील वडवली येथे तलावाजवळ एका जागेवर भरणीचे काम सुरू होते. याच दरम्यान गावामधील दोन गटात जमिनीवर सुरू असलेल्या भरणीच्या कामाच्या वादातून हाणामारी झाली. धारदार शस्त्र, तलवार व बंदुकीच्या साहाय्याने एकमेकांना मारहाण करण्यात आली. शिवसेनेचे माजी नगरसेवक दुर्योधन पाटील यांनी पिस्टलने मारहाण केल्याचा आरोप करण्यात आला आहे. या हाणामारी तीन ते चार जखमी झाले असून त्यांना उपचारासाठी रुग्णालयात दाखल करण्यात आले आहे. याप्रकरणी दोन्ही गटाच्या परस्पर विरोधी तक्रारी दाखल करण्यात आल्या असून खडकपाडा पोलिसांनी शिवसेनेचे माजी नगरसेवक दुर्योधन पाटील, वैभव पाटील, पंकज पाटील, मनोहर पाटील, राहुल पाटील, कमलाकर पाटील विरोधात गुन्हे दाखल केले आहेत.
याप्रकरणी पोलिसांनी पुढील तपास सुरू केला. तर याप्रकरणी शिवसेना माजी नगरसेवक दुर्योधन पाटील यांच्याशी संपर्क साधला असता त्यांच्याशी संपर्क होऊ शकला नाही.