शिंदे गटाकडून मुंब्र्याची शाखा पाडली; नवीन शाखा बांधणार
ठाणे: ठाण्यात शिवसेना शाखा ताब्यात घेण्यावरून पुन्हा एकदा वाद पेटला आहे. मुंब्र्यातील शिवसेना शाखा गुरुवारी दुपारी शिंदे गटाने आपल्या ताब्यात घेतली असून रात्री ही शाखा पाडण्यात आली. या जागी नवीन शाखा उभारण्यात येणार असल्याचे सांगण्यात आले.
या शाखेमध्ये गैरकारभार सुरु होता तसेच यामध्ये कोणत्याही प्रकारची समाजोपयोगी कामे होत नव्हती, असा आरोप शिंदे गटाने केला आहे. ही शाखा तोडून पुन्हा नव्याने शाखा बांधण्यात येणार असल्याचे शिंदे गटाच्या पदाधिकाऱ्यांनी स्पष्ट केले आहे.
या ठिकाणी कोणताही गैरकारभार सुरु नव्हता, असा खुलासा ठाकरे गटाच्या पदाधिकाऱ्यांनी केला आहे. वरिष्ठांचा आदेश आल्यानंतरच पुढचे पाऊल उचलले जाईल, असे ठाकरे गटाच्या पदाधिकाऱ्यांनी स्पष्ट केले आहे.
शिवसेना पक्षात उभी फूट पडल्यानंतर शिंदे आणि ठाकरे असे दोन गट निर्माण झाले आहेत. खरी शिवसेना आमचीच असा दावा दोन्ही गटांकडून केला जात आहे. त्यामुळे शिवसेना शाखा कोणाच्या? हा तिढा अजूनही सुटलेला नाही. पक्षात दोन गट पडल्यानंतर शाखा ताब्यात घेण्यावरून यापूर्वीच वाद चिघळला होता. शाखा ताब्यात घेण्यावरून दोन्ही गटाचे पदाधिकारी आणि कार्यकर्ते यापूर्वीही आमने-सामने आले आहेत. गुरुवारी मुंब्र्याच्या मध्यवर्ती ठिकाणी असलेली शाखा शिंदे गटाने ताब्यात घेतली.
गुरुवारी दुपारी ठाकरे गटाचे पदाधिकारी विजय कदम आणि पदाधिकारी शाखेत बसले असताना शिंदे गटाचे पदाधिकारी आणि माजी नगरसेवक राजन किणे हे त्यांच्या समर्थकांसह या शाखेत आले आणि या शाखेचा ताबा त्यांनी घेतला. विशेष म्हणजे ही शाखा ताब्यात घेऊन ते थांबले नाहीत तर रात्री ही शाखा पाडण्यात आली.
मुंब्रा-कौसा मध्यवर्ती शिवसेना शाखा या ठिकाणी शाखेच्या नावाने गैरकारभार सुरू होता असा आरोप राजन किणे यांनी केला आहे. शाखेच्या आजूबाजुचा परिसर भाड्याने देऊन पैसे कमवण्याचे काम सुरू होते, या शाखेत कोणत्याही प्रकारचे समाजोपयोगी काम होत नव्हते. कुठलीही नोंदणी या शाखेत होत नव्हती. या कारणास्तव ही शाखा आम्ही तोडून नव्याने शिवसेना शाखा बांधत असल्याचे राजन किणे यांनी स्पष्ट केले आहे. यापुढे नव्याने चांगली शाखा बांधून समाजोपयोगी कामे होणार असल्याचे देखील राजन किणे यांनी सांगितले आहे.
दुसरीकडे ठाकरे गटाकडून किणे यांनी लावलेले सर्व आरोप फेटाळण्यात आले आहेत. या ठिकाणी कुठेही कमर्शियल काम तसेच गाळे भाड्याने दिले जात नव्हते, असा खुलासा ठाकरे गटाचे पदाधिकारी विजय कदम यांनी केला आहे. वरिष्ठांना विचारल्याशिवाय पुढील भूमिका घेतली जाणार नाही असे देखील कदम यांच्याकडून स्पष्ट करण्यात आले आहे.
शिंदे गटाचे पदाधिकारी आणि माजी नगरसेवक असलेल्या राजन किणे यांनी जितेंद्र आव्हाड यांना त्यांच्या मतदारसंघात आव्हान देण्यासाठी मुंब्रा विकास आघाडीची स्थापना केली आहे. त्यामुळे भविष्यात ठाकरे गट आणि शिंदे गटात मुंब्र्यात कमालीचा संघर्ष पाहायला मिळण्याची शक्यता आहे.