कल्याण : कल्याण पूर्वेतील एका खासगी रुग्णालयामध्ये शॉर्टसर्किट झाल्यामुळे रुग्णांच्या नातेवाईकांची व हॉस्पिटलच्या स्टाफची पळापळ झाली.
कल्याण पूर्व चक्की नाका परिसरामध्ये जनकल्याण हॉस्पिटलमध्ये अचानक शॉर्टसर्किट झाल्यामुळे हॉस्पिटलमध्ये धूरच धूर पसरला. शॉर्टसर्किटमुळे हॉस्पिटलला आग लागली म्हणून रुग्णांच्या नातेवाईक व हॉस्पिटलच्या स्टाफची धावपळ सुरू झाली. परिसरातील नागरिक देखील याठिकाणी मोठ्या प्रमाणात जमा झाले.
रुग्णालयामध्ये 20 ते 25 रुग्ण उपचार घेत आहेत, परंतु या शॉर्टसर्किटमुळे हॉस्पिटलमधील रुग्णांना कोणतीही दुखापत झाली नाही. हॉस्पिटलच्या स्टाफने अग्निशामक दलाला कळवताच अग्निशामक दलाने घटनास्थळी येऊन परिस्थिती आटोक्यात आणली.