आ. प्रताप सरनाईक यांची मुख्यमंत्र्यांकडे मागणी
ठाणे: ठाणे जिल्ह्यात आणि शहरामध्ये दुर्घटना अथवा काही महत्वाच्या घटना घडल्यास हेलिपॅड उपलब्ध असावे यासाठी पोखरण मार्ग १ वरील एअरफोर्सच्या जागेवर हेलिपॅडची उभारणी करावी, अशी मागणी आमदार प्रताप सरनाईक यांनी मुख्यमंत्री एकनाथ शिंदे यांच्याकडे केली आहे.
ठाणे शहरामध्ये रेमंड या बंद पडलेल्या टेक्सटाईल कंपनीच्या जागेवर विजयपथ सिंघानिया यांनी हेलिपॅडची सुविधा स्वत:करिता निर्माण केलेली आहे. या सुविधेचा फायदा सिंघानिया परिवाराबरोबर सर्व राष्ट्रीय पक्षांना होतो तसेच काही महत्वाच्या घटनांसाठी या हेलिपॅडचा वापर होत असतो. रेमंड व्यवस्थापनाने टेक्सटाईल्स कंपनी बंद करून त्याठिकाणी गृहप्रकल्प उभारण्यास सुरूवात केली आहे. काही वर्षांनंतर त्या ठिकाणी असलेल्या हेलिपॅडच्या जमिनीवरही प्रकल्प उभे राहू शकतात. अशावेळी ठाणे जिल्ह्यात आणि शहरामध्ये दुर्घटना अथवा काही महत्वाच्या घटना घडल्यास हेलिपॅडची सुविधा मिळू शकणार नाही. पोखरण मार्ग १ मधील येऊरच्या पायथ्याशी असलेल्या एअरफोर्सचे मोकळे मैदान आहे. संरक्षण खात्याची ही जागा उपलब्ध असून या ठिकाणी संरक्षण खात्याचे फायर रेंज आहे, तर काही ठिकाणी झोपड्यांचे अतिक्रमण झालेले आहे. या मोकळ्या मैदानावर जर कायमस्वरूपी हेलिपॅडची सुविधा निर्माण केली तर त्याचा फायदा येऊर येथील संरक्षण दलाच्या कामासाठी होऊन तेथील जागेचे संरक्षण होईल व अतिक्रमणापासून देखील त्याचा बचाव होईल. तसेच प्रसंगी इमरजन्सी लँडिंग, राजकिय सभा, ट्रॅफिकच्या समस्येमुळे एका हॉस्पिटलमधून दुसऱ्या हॉस्पिटलमध्ये रूग्णाला नेण्यासाठी एअर अँब्युलन्सची सुविधा आणि इतर अनेक महत्वाच्या गोष्टींसाठी या हेलिपॅडचा फायदा ठाणेकरांना होऊ शकतो, असे मत श्री.सरनाईक यांनी पत्रात व्यक्त केले आहे.
केंद्रामध्ये भाजपा आणि शिवसेना महायुतीचे सरकार असून संरक्षण मंत्री म्हणून राजनाथ सिंह आहेत. त्यांच्याशी आपले अतिशय मित्रत्वाचे संबंध आहेत. एक ठाणेकर नागरिक म्हणून आपण जर ही मागणी त्यांच्याकडे केली तर ते निश्चितपणे पूर्ण करतील. संरक्षण मंत्र्यांना येऊरच्या पायथ्याशी असलेल्या एअरफोर्सच्या मोकळ्या मैदानावर कायमस्वरूपी हेलिपॅडची सुविधा निर्माण करण्यासंदर्भात आग्रह धरावा, असे साकडे श्री.सरनाईक यांनी मुख्यमंत्र्यांना घातले आहे.