सेना-राष्ट्रवादीचे पदाधिकारी भाजपच्या संपर्कात
ठाणे : आरक्षण सोडत निघाल्यानंतर सर्व राजकीय पक्षांत पदाधिकारी आणि इच्छुक उमेदवारांची घालमेल सुरू झाली आहे. या पार्श्वभूमीवर शिवसेना आणि राष्ट्रवादीतील नाराज पदाधिकाऱ्यांना भाजपात प्रवेश देण्याची तयारी केली आहे. कोपरी-पाचपाखाडी विधानसभा मतदारसंघ क्षेत्रात शिवसेनेतील नाराज पदाधिकारीही भाजपच्या संपर्कात असल्याचे भाजप नेत्यांकडून सांगण्यात येत आहे.
ठाणे महापालिका निवडणुकीसाठी महिला आरक्षण प्रक्रिया नुकतीच उरकण्यात आली असून पावसाळ्यानंतर पालिका निवडणूक होण्याची शक्यता वर्तवली जात आहे. यामुळे सर्वच राजकीय पक्षांसह इच्छूक उमेदवार कामाला लागल्याचे चित्र आहे. असेच काहीसे चित्र काही महिन्यांपूर्वी शहरात होते. निवडणूक जाहीर होण्याची शक्यता लक्षात घेऊन भाजपच्या नेत्यांनी शहरात मिशन कमळ राबविण्यास सुरुवात केल्याचे चित्र होते. यात विद्यमान नगरसेवकाप्रमाणेच प्रभागात मताधिक्य घेऊ शकेल, अशा दुसऱ्या फळीतील नाराज शाखाप्रमुख आणि पदाधिकाऱ्यांना हेरून भाजप त्यांना पक्षप्रवेश देत होती. अशाचप्रकारे किसननगर आणि वर्तकनगर भागातील शाखाप्रमुखांना पक्षप्रवेश देऊन भाजपने सेनेला धक्का दिला होता. त्यानंतर दिव्यातील भाजपचे प्रमुख पदाधिकारी निलेश पाटील आणि आदेश भगत यांना शिवसेनेने पक्ष प्रवेश देऊन भाजपला प्रतिउत्तर दिले होते. परंतु निवडणुका लांबणीवर पडणार असल्याचे समजताच पक्षप्रवेशाची मालिका थंडावली होती. आता पावसाळ्यानंतर निवडणूका होणार असल्याचे बोलले जात असून यामुळे भाजपने पुन्हा कमळ मिशन राबविण्यास सुरुवात केल्याची चर्चा आहे.
वागळे इस्टेट परिसर हा शिवसेनेचा बालेकिल्ला म्हणून ओळखला जातो. तसेच हाच परिसर ठाणे जिल्ह्याचे पालकमंत्री एकनाथ शिंदे यांचा मतदार संघात येतो. याच भागातून शिवसेनेचे सर्वाधिक नगरसेवक निवडून येतात. यामुळे भाजपच्या स्थानिक नेत्यांनी आता याच भागावर लक्ष केंद्रित केल्याचे सूत्रांकडून समजते. नाराज असलेले शिवसेनेचे माजी नगरसेवक, शाखाप्रमुख आणि पदाधिकाऱ्यांना भाजपचे स्थानिक वरीष्ठ नेते फोनवरून संपर्क साधत असून त्यामध्ये ते त्यांना पक्ष प्रवेशासाठी गळ घालत आहेत. राष्ट्रवादीततून भाजपात आलेल्या काही नेत्यांनी वागळे परिसरातील राष्ट्रवादीच्या पदाधिकाऱ्यांना संपर्क साधल्याची चर्चा आहे.
कोट
भाजप आणि शिवसेनेची बराच काळ युती होती. त्यामुळे शिवसेनेतील कार्यकर्ते आणि पदाधिकारी अजूनही भाजपच्या संपर्कात आहेत. जर कोणी नाराज असेल तर त्याला पक्षप्रवेश द्यायला काहीच हरकत नाही. ठाण्यात भाजपची ताकद वाढली आहे, ती आणखी वाढवण्यासाठी पक्षाकडून प्रयत्न सुरु आहेत.
– संजय केळकर,आमदार-ठाणे