दिव्यांच्या माध्यमातून रेखाटली सर्वात मोठी चित्र-रांगोळी
डोंबिवली : अयोध्येतील प्रभू श्रीराम प्राणप्रतिष्ठापना सोहळ्यानिमित्त कल्याण लोकसभेचे खासदार डॉ. श्रीकांत शिंदे यांच्या संकल्पनेतून डोंबिवलीतील संत श्री सावळाराम महाराज क्रिडा संकुलात एक लाख ११ हजार १११ हून जास्त दिव्यांच्या माध्यमातून प्रभू श्रीरामाची दिव्य आणि तेजस्वी अशी प्रतिकृती साकारण्यात आली. याची दखल घेत याची ऑल इंडिया रेकॉर्डमध्येही नोंद करण्यात आली आहे.
कल्याण लोकसभा मतदारसंघाचे खासदार डॉ. श्रीकांत शिंदे यांच्या माध्यमातून अयोध्येतील प्रभू श्रीराम मंदिर लोकार्पण सोहळा निमित्त विविध अध्यात्मिक आणि सांस्कृतिक कार्यक्रमांचे आयोजन करण्यात आले होते. या अंतर्गत आज डोंबिवली येथील संत सावळाराम महाराज क्रीडा संकुल येथे दीपोत्सव कार्यक्रमाचे आयोजन करण्यात आले होते.
या दीपोत्सवात साकारण्यात आलेल्या प्रतिकृतीमध्ये.अयोध्या मंदिरासह श्रीरामाचे सर्वात मोठे चित्र काढले आहे. 160 फूट रुंद, 160 फूट उंची अशा एकूण 25600 चौरस फूट आकारामध्ये 1,11,111 दिवे (तेल दिवे) वापरून जागतिक विक्रम प्रस्थापित करण्यात आला. रांगोळी कलाकार चेतन राऊत आणि शिवसेना युवा टीम सदस्यांनी हे पोर्ट्रेट डिझाइन केले होते.
एकीकडे गदिमा रचित गीत रामायणातील अवीट गोडीचे सुमधुर सूर आणि दुसरीकडे लक्ष दिवे प्रज्वलित करण्यासाठी उसळलेला रामभक्तांचा जनसागर. संध्याकाळी साडे पाच वाजल्यापासून डोंबिवली आणि आसपासच्या परिसरातील शेकडो रामभक्तांची पावले संत श्री सावळाराम महाराज क्रिडा संकुलाकडे वळू लागली होती. ज्यामध्ये तरुण वर्गासह महिला भगिनींचीही लक्षणीय संख्या होती.
या भव्य दिपोत्सवाप्रमाणे याठिकाणी झालेल्या महाआरतीनेही उपस्थितांच्या डोळ्यांचे पारणे फेडले. या महाआरतीसाठी वाराणसीच्या काशी येथील 32 ब्रह्मवृंदांची उपस्थिती होती. ज्याप्रमाणे काशी येथे गंगाआरती केली जाते, त्याच धर्तीवर डोंबिवलीच्या या क्रिडा संकुलात ही महाआरती झाली. त्यापूर्वी झालेल्या अतिशय नयनरम्य अशा फटाक्यांच्या आतिषबाजीने उपस्थितांच्या डोळ्यांचे पारणे फेडले.
यावेळी सार्वजनिक बांधकाममंत्री रविंद्र चव्हाण आणि खासदार डॉ. श्रीकांत शिंदे यांच्या हस्ते कल्याण लोकसभेतील विद्युत रोषणाईचेही प्रज्वलन करण्यात आले. कल्याण डोंबिवलीसह मतदारसंघामध्ये दहा प्रमुख ठिकाणी ही विद्युत रोषणाई करण्यात आली आहे.