मंत्री प्रताप सरनाईक यांनी ठेकेदाराला खडसावले
भाईंदर: दहिसर येथील टोल प्लाझा येथे मोठ्या प्रमाणात वाहतूक कोंडी होत असल्याच्या तक्रारी आल्याने संतापलेल्या स्थानिक आमदार आणि परिवहन मंत्री प्रताप सरनाईक यांनी गुरुवारी घटनास्थळी भेट देऊन ठेकेदाराला ढिसाळ कारभाराबद्दल खडसावले.
परिवहन मंत्री प्रताप सरनाईक यांच्यासमवेत महापालिका आयुक्त संजय काटकर, मुंबई महानगर प्रदेश विकास प्राधिकरण (एमएमआरडीए), वाहतूक विभाग आणि प्रादेशिक वाहतूक कार्यालय (आरटीओ) च्या अधिकाऱ्यांनी टोल वसुली एजन्सीच्या प्रतिनिधींना कॉम्पॅक्ट बॅरिकेड्स बसवून वाहतूक प्रवाह सुरळीत करण्यासाठी तीन दिवसांची मुदत दिली. गर्दी कमी करणे आणि सुरळीत अखंड वाहतूक करण्याबाबत मी तीन दिवसांच्या मुदतीसह आवश्यक दिशानिर्देश केले आहेत. कंत्राटदाराने उपचारात्मक उपायांचे पालन केले आहे की नाही याची खात्री करण्यासाठी मी सोमवारी घटनास्थळी पुन्हा भेट देईन, असे मंत्री प्रताप सरनाईक म्हणाले.
तत्कालीन मुख्यमंत्री एकनाथ शिंदे यांच्या नेतृत्वाखालील सरकारने गेल्या वर्षी १५ ऑक्टोबर रोजी दहिसर टोल प्लाझासह मुंबईतील पाचही टोल नाक्यांवर हलक्या मोटार वाहनांना (एलएमव्ही) संपूर्ण टोलमाफी दिली होती. दहिसर टोलनाका येथे वाहतूक, मेट्रो लाईन आणि उड्डाणपूलाच्या कामांची पाहणी सरनाईक यांनी केली. तसेच मीरा रोड येथील एस. के. स्टोन ब्रिजचे बांधकाम अंतिम टप्प्यात आले असून लवकरच या ब्रिजचे लोकार्पण होणार आहे. या दृष्टीने कामाची पाहणी करून उर्वरीत कामे लवकरात लवकर पूर्ण करण्यात यावीत, अशा सूचना त्यांनी अधिकाऱ्यांना केल्या.