महिलांना तिकीट दरात ५० टक्के सवलत
ठाणे : ठाणे परिवहन सेवेचा ७१८.७४ कोटींचा अर्थसंकल्प गुरुवारी परिवहनचे सभापती विलास जोशी यांनी महापालिका आयुक्त अभिजित बांगर यांना सादर केला. यात
परिवहनने महापालिकेकडे ४५९ कोटी रुपयांचे अनुदान मागितले होते, मात्र पालिका फक्त २६० कोटी रुपये देणार असल्याने परिवहनच्या पदरात निराशा पडली आहे. तरीही परिवहनने महिलांना तिकीट दरात ५० टक्के सवलत देऊन खऱ्या अर्थाने महिला दिन साजरा केला आहे.
परिवहन प्रशासनाने ठाणे महापालिकेकडून अनुदानापोटी ४५८.९६ कोटींची मागणी केली होती. ठाणे महापालिकेने मात्र आपल्या अर्थसंकल्पात प्रत्त्यक्षात २६० कोटीच परिवहन सेवेला दिले असल्याने यावर्षीही ठाणे महापालिकेकडून परिवहन सेवेला पाने पुसण्यात आली आहेत. परिवहन सेवेच्या ताफ्यात ई बसेस तसेच बसेसची संख्या वाढवण्यासोबतच मोबाइल अ‍ॅपद्वारे तिकीट देण्याची सुविधा देण्यात येणार असल्याची घोषणा परिवहनच्या अर्थसंकल्पात करण्यात आली आहे.
सर्वसामान्य ठाणेकरांची जीवनवाहिनी मानल्या जाणाऱ्या परिवहन सेवेचे अर्थसंकल्प गुरुवारी सादर करण्यात आला. यावर्षीच्या अर्थसंकल्पात परिवहनच्या ताफ्यात बसेसची संख्या आणि विशेष करून ई बसेसची संख्या वाढवण्यावर भर देण्यात आला आहे.
ठाणे परिवहनच्या ताफ्यात १२३ इलेक्ट्रीक बस दाखल झाल्या आहेत. तर आणखी ८६ बस दाखल होणार आहेत. तर पीएमई योजनेंतर्गत परिवहनला आणखी १०० इलेक्ट्रीक बसचे बळ मिळणार आहे. दुसरीकडे दर्जात्मक सुधारणांसाठी प्रयत्न करण्याचे महापालिकेने प्रस्तावित केले आहे. त्यानुसार महापालिका शाळेतील विद्यार्थ्यांना घरापासून शाळेचे ठिकाण या प्रवासाचा आढावा घेऊन ज्या शाळेची विद्यार्थी पटसंख्या अधिक असेल त्याठिकाणी अतिरिक्त बस फेऱ्या वाढविणे, आरटीओ आणि वाहतुक पोलिसांशी समन्वय साधून अवैध्य खाजगी वाहतुकीला आळा बसविण्यासाठी प्रयत्न, व्हेअर इज माय टीएमटी बस या अ‍ॅपच्या माध्यमातून परिवहनची बस कुठे आहे, याची माहिती उपलब्ध होणे. याशिवाय परिवहन सेवेकडे द डेप्लॉमेंट अ‍ॅण्ड मेटेनेन्स आॅफ डीजीटल (मोबाईल) तिकीटींग अ‍ॅण्ड डीजीटल पासेस विथ व्हॅलीडेशन सिस्टम सुविधा लागू करण्यात येणार आहे. यामुळे प्रवाशाांना अद्ययावत व सुरक्षित तिकीट सुविधा मिळणार, वाहकांचा देखील सुट्या पैशांचा ताण कमी होणार, मोबाइल तिकीटींगींमुळे पास उपलब्ध करुन देणे सोयीचे होणार आहे.
दैनंदिन तसेच मासिक पासधारक यांना मोबाइलमधील अ‍ॅपच्या माध्यमातून पास काढणे होणार सुलभ, या अ‍ॅपद्वारे प्रवासी तिकीट सहज बुक करु शकणार, क्युआर कोड स्कॅनिगंद्वारे इलेक्ट्रॉनिक तिकीट मशिन वापरुन कंडक्टद्वारे तिकीटे प्रमाणित करण्यात येणार, तिकीटाचे पैसे ऑनलाईन परिवहनकडे जमा होणार. आयटीएमएस व सीसीसी आणि संगणक प्रणाली अद्ययावत करण्यात येत असून त्यामुळे प्रशासनाचे सर्व बसवर नियंत्रण राहणार आहे. वेबसाईट व अ‍ॅपद्वारे प्रवाशांना बस आगमन निर्गमनाची अचूक वेळ मिळणार आहे.
ठाणे परिवहन सेवेने पालिकेकडून ४५८.९६ कोटींच्या अनुदानाची अपेक्षा ठेवली होती. परंतु पालिकेने सादर केलेल्या अर्थसंकल्पात पहिल्या टप्यासाठी २६० कोटींची तरतूद प्रस्तावित करण्यात आली आहे.त्यामुळे यावर्षीही ठाणे महापालिकेकडून मिळणाऱ्या अनुदानापोटी परिवहन प्रशासनाची निराशा झाली आहे.
परिवहन सेवेत तिकीट दरात महिलांना ५० टक्के सवलत देण्याचा निर्णय परिवहन प्रशासनाने घेतला आहे. परिवहनच्या या निर्णयामुळे महिला वर्गात आनंदाचे वातावरण आहे. दुसरीकडे यापूर्वी ७५ वयापर्यंतच्या नागरिकांना परिवहनमध्ये मोफत प्रवास करता येत होता. आता ६० वर्षांवरील नागरिकांनाही परिवहन सेवेत ५० टक्के सवलत देण्याचा निर्णय घेण्यात आला आहे. या निर्णयामुळे परिवहन सेवेवर मात्र वार्षिक २५ कोटींचा बोजा वाढणार असून हे नुकसान कसे भरून काढायचे असा प्रश्न परिवहन प्रशासनाला पडला आहे.