ग्रामस्थांची जिल्हाधिकाऱ्यांकडे धाव
भिवंडी : भिवंडी तालुक्यातील गोडाऊन परिसरातील मौजे वेहेळे-भाटाळे ग्रुप ग्रामपंचायतीचे सरपंच आणि त्यांच्या पतीने सार्वजनिक रहदारीच्या रस्त्यावर बेकायदेशीरपणे अतिक्रमण करून रस्ता वाहतुकीस बंद केल्याची तक्रार माजी सरपंचाने ठाणे जिल्हाधिकारी यांच्याकडे केली आहे.
भिवंडी तालुक्यातील गोडाऊन हब म्हणून ओळखल्या जाणाऱ्या परिसरात मौजे वेहेळे-भाटाळेच्या महिला सरपंच आणि त्यांचे पती यांनी वेहेळे-भाटाळे येथील सार्वजनिक रस्ता त्यांचे वैयक्तिक कामासाठी कुंपण लावून बंद केला आहे. हा रस्ता मुंबई प्रदेश विकास प्राधिकरणाच्या अखत्यारित असून हा रस्ता बंद केल्यामुळे रहदारीस अडथळे निर्माण झाले असून ग्रामस्थांना अन्य पर्यायी रस्ता नसल्यामुळे त्यांचे हाल होत आहेत.
निवेदनाच्या प्रती आवश्यक कार्यवाहीस्तव भिवंडीचे उपविभागीय अधिकारी यांचे कार्यालयास व तहसीलदार भिवंडी यांना रवाना केल्या आहेत. मौजे वेहेळे-भाटाळे ग्रामपंचायत क्षेत्रातील सार्वजनिक रस्ता बंद केल्याची तक्रार प्राप्त झाली असून चौकशी करून सर्व संबंधितांवर कायदेशीर कारवाई केली जाईल, अशी प्रतिक्रिया तहसीलदार अधिक पाटील यांनी दिली.