ठाणे : शिवसेना (उद्धव बाळासाहेब ठाकरे) आणि युवासेना यांच्या सहकार्याने ओवळा-माजिवडा विधानसभा क्षेत्र आणि आसपासच्या परिसरातील बेरोजगार युवक-युवतींसाठी महारोजगार मेळाव्याचे आयोजन करण्यात आले आहे.
माजी उपमहापौर आणि ओवळा-माजिवडा विधानसभा क्षेत्र संपर्कप्रमुख नरेश मणेरा आणि महायुवा फाऊंडेशन यांच्या संयुक्त विद्यमाने येत्या १४ जानेवारी, २०२३ रोजी घोडबंदर रोड विभागात भव्य महारोजगार मेळावा आयोजित करण्यात आलेला आहे. घोडबंदर रोड विभागातील आनंदनगर-कावेसर येथील न्यू होरायझन स्कॉलर स्कूल येथे सकाळी १० ते दुपारी ३ वाजेपर्यंत असणाऱ्या या महारोजगार मेळाव्यात महिंद्रा अँड महिंद्रा, जितेंद्र व्हील्स, हयात, केएलटी, टेलीपरफॉरमन्स, ग्रेटर बँक, युरेका, एआयटीएम, ताज सेट्स, टेक महिंद्रा, पेटीएम, जस्ट डायल, अमेझॉन, एअरटेल, आयसीआयसीआय, अँप्पल, व्ही फाईव्ह, आजी केअर, युरेका फोरबेस लि., सेक्युर क्रेडीशनल, अटॉस, कोटक बँक, क्वेस, मनीटॉक, अँड्रोमेडा, महिंद्रा फायनान्स, ओएलएक्स, सोलफ्लॉवर, इनऑक्स, फूडअड्डा, सीसीडी, क्यू कनेक्ट, इनफिनिटी स्मार्ट, टेलीएक्सेस, क्राफ्ट वर्ड, अथेना, सीटूसी, टॉक टॉक, पिपल चॉईस, इबीक्स कॅश, फ्लायनान्स, रिलायन्स, बिग बास्केट आदी ५० बँक आणि अस्थापनांचा समावेश आहे.
या मेळाव्यामध्ये दहावी ते पदवीपर्यंत आणि त्यापुढील इंजिनिअरिंग, एमबीए, टेक्निकल आदी उच्च शिक्षण घेतलेल्या तसेच कुशल-अकुशल, नवखे आणि अनुभवी बेरोजगारांसाठी पात्रतेनुसार विविध नोकरीच्या संधी उपलब्ध होणार आहेत. मेळाव्याच्या ठिकाणीच सहभागी कंपन्या आस्थापनांतर्फे बेरोजगारांच्या थेट मुलाखती घेऊन त्यांना ऑन द स्पॉट नोकरीची नियुक्तीपत्रे देण्यात येणार आहेत. या महारोजगार मेळाव्यात सहभागी होण्यासाठी www.nareshmanera.com या वेबसाईटवर किंवा http://bit.ly/SHIVSENATHANE या लिंकवर जाऊन नोकरीसाठी ईच्छूक बेरोजगारांनी आगाऊ नोंदणी करावयाची आहे. ज्या उमेदवारांना अशाप्रकारे नोंदणी करता आली नसेल अशांसाठी प्रत्यक्ष महारोजगार मेळाव्याच्या ठिकाणी फॉर्म भरून नोंदणी करण्याची व्यवस्था सुद्धा करण्यात आली आहे. तसेच या महारोजगार मेळाव्यामध्ये असणाऱ्या नोकरीच्या संधीची माहिती देण्यासाठी १३ जानेवारी, २०२३ रोजी न्यू होरायझन स्कॉलर स्कूल, आनंदनगर-कावेसर, घोडबंदर रोड याठिकाणी दुपारी ३ वाजता मार्गदर्शन शिबिराचे आयोजन करण्यात आल्याची माहिती नरेश मणेरा यांनी दिली.
मेळाव्याचे उद्धाटन शिवसेना नेते, युवासेना प्रमुख, आमदार आदित्य ठाकरे यांचे हस्ते होणार असून शिवसेना नेते, खासदार अरविंद सावंत, खासदार राजन विचारे, युवासेना सचिव वरुण सरदेसाई हे प्रमुख पाहुणे म्हणून उपस्थित राहणार आहेत.