कशेळी खाडीवर मेट्रोचे ५०टक्के काम पूर्ण
ठाणे : मेट्रो मार्ग ५ अंतर्गत असलेल्या ठाणे-भिवंडी-कल्याण या मर्गिकेतील ठाणे ते भिवंडी दरम्यान १२.७ किमीचा पहिला टप्पा प्रगतीपथावर आहे. यामध्ये एकुण सहा पूर्णत: उन्नत (एलिव्हेटेड) स्थानके असणार आहेत. मर्गिकेच्या या टप्प्यातील स्थानकांची स्थापत्य कामे ६४% पूर्ण झाली असून एकूण ७०% इतकी भौतिक प्रगती साध्य करण्यात आली.
मेट्रो मार्ग ५ च्या संरेखनात (अलाईनमेंट) कशेळी येथे ५५० मीटर लांबीची खाडी आहे. खाडीवर मेट्रोचा पुल उभारण्यासाठी ‘सेगमेंटल बॉक्स गर्डर’ या पद्धतीचा वापर करून एकुण १३ स्पॅन उभारण्यात येणार आहेत. सद्यस्थितीत आठ स्पॅनची उभारणी पूर्ण झाली आहे. या प्रत्येक स्पॅनची लांबी सुमारे ४२ मीटर इतकी असेल.
मार्गिका ५ च्या पहिल्या-वहिल्या टप्प्यात घोडबंदर रस्त्यावरील कापूरबावडी (मेट्रो ४ व ५ चे एकत्रीकृत स्थानक), बाळकुम नाका, कशेळी, काल्हेर, पूर्णा, अंजूरफाटा व धामणकर नाका (भिवंडी) या स्थानकांचा समावेश आहे.
मेट्रो मार्गिका ५ चा पहिला टप्पा ठाणे ते भिवंडी दरम्यान ‘कनेक्टिव्हिटी’ प्रदान करणार आहे. ज्यामुळे नागरिकांना वाहतुकीची एक नवीन आणि पर्यावरणपूरक व्यवस्था उपलब्ध होणार आहे. उपनगरीय रेल्वे, बेस्ट, ठाणे परिवहन बस सेवा यांसारख्या सार्वजनिक वाहतूक व्यवस्थेवरील भार कमी होण्यास मदत होईल. ही मार्गिका कार्यान्वित झाल्यावर प्रवासाच्या वेळेत साधारणत: २० मिनिटांची बचत होईल.
‘मेट्रो मार्गिका पाचसाठी कशेळी येथे मध्यवर्ती आगारासाठी (सेंट्रलाइज्ड डेपो) जागा निश्चित करण्यात आली असून भूसंपादन आणि निविदा प्रक्रियाचे काम प्रगतीपथावर आहे. या मार्गिकेतील अंजूरफाटा येथे ‘रेल्वे ओव्हर ब्रीज’करीता स्पेशल स्टील गर्डर स्पॅन बसवण्यात येणार आहेत. त्याचे काम लवकरच सुरू होईल, अशी माहिती एमएमआरडीएचे महानगर आयुक्त एस.व्ही.आर. श्रीनिवास यांनी दिली.