रेल्वे प्रवाशांची तहान भागणार
ठाणे : दिवा स्थानकातून मुंबई, कर्जत-कसारा, वसई, पनवेल व कोकण येथे जाणारे लाखो प्रवासी रोज प्रवास करतात. या प्रवाशांची तहान भागवण्यासाठी रेल्वे प्रशासनाने प्रत्येक फलाटावर पाणपोई सुरू करण्याचा निर्णय घेतला आहे.
मागील काही वर्षात दिवा स्थानकाचा चेहरा-मोहरा बदलला असला तरी येथील प्रवाशांना पिण्याच्या पाण्याची सोय करून देण्यात रेल्वे प्रशासन सातत्याने अपयशी ठरत होते. रेल्वे प्रवाशांना स्वस्त आणि स्वच्छ पाणी मिळावे यासाठी रेल्वे प्रशासनाने काही वर्षांपूर्वी मध्य रेल्वेवर सर्व स्थानकात वॉटर वेंडिंग मशीन स्थापित केल्या होत्या. या यंत्रांना इतर स्थानकात अत्यल्प प्रतिसाद मिळाला असला तरी दिवा स्थानकात वॉटर वेंडिंग यंत्रांना प्रवाशांकडून प्रचंड प्रतिसाद लाभत होता. पण कालांतराने ही यंत्रे बंद झाली आणि दिवेकर रेल्वे प्रवाशांना पुन्हा पाण्यासाठी टाहो फोडत बसावे लागले होते. दिवेकर रेल्वे प्रवाशांना धड फलाटावरील कँटीनमध्ये सुद्धा पाणी मिळत नसल्याने प्रवाशांची प्रचंड गैरसोय होत होती. दिवा रेल्वे प्रवासी संघटनेने याविषयी वेळोवेळी प्रशासनाशी संपर्क साधून यावर तोडगा काढायची विनंती केली होती.
रेल्वे प्रशासनाने दिवा स्थानकातील प्रत्येक फलाटावर पाणपोईचे काम सुरू केले असून त्यामुळे रेल्वे प्रवाशांची पिण्याच्या पाण्याची सोय होणार असल्याचे क्षेत्रीय सल्लागार समिती सदस्य व दिवा रेल्वे प्रवासी संघटनेचे अध्यक्ष आदेश भगत यांनी सांगितले.