पुर्वेश सरनाईक यांचा पुढाकार
ठाणे : संस्कृती युवा प्रतिष्ठान व प्रताप सरनाईक फाऊंडेशन यांच्या संयुक्त विद्यमाने ठाणे शहरातील नागरिकांसाठी नाताळनिमित्त २३ डिसेंबर ते १ जानेवारी, २०२३ पर्यंत उपवन येथे वंडरलँड फेस्टिवलचे आयोजन करण्यात येणार आहे. त्यानिमित्त उपवन जेट्टी येथे ख्रिसमस ट्री उभारण्यात येणार असून आकर्षक विद्युत रोषणाई करण्यात येणार आहे.
लोकमान्यनगर-शास्त्रीनगर विभाग व आजूबाजूच्या परिसरातील नागरिकांसाठी ’संस्कृती कला-क्रीडा महोत्सवाचे देखील आयोजन २४ ते २७ डिसेंबर, २०२२ पर्यंत करण्यात येणार आहे. संस्कृती कला-क्रीडा महोत्सवाचे हे चौथे वर्ष असून यामध्ये बुध्दिबळ, कॅरम, क्रिकेट, स्विमिंग, चित्रकला, रांगोळी, पाककला, गायन, नृत्य, फॅन्सी ड्रेस, मिस व मिसेस लोकमान्यनगर व होम-मिनिस्टर या विविध स्पर्धा घेण्यात येणार आहेत. या स्पर्धांमध्ये लहान मुलांपासून, महिला, पुरूष ते जेष्ठ नागरिकांपर्यंत सर्वच वयोगटातील स्पर्धक सहभागी होत असतात. दरवर्षी अंदाजे अडीच ते तीन हजार स्पर्धक सहभागी होत असतात. स्थानिकांच्या कला-गुणांना वाव मिळावा व आपली कला जोपासावी या मुळ उद्देशाने पुर्वेश सरनाईक यांनी या कला-क्रीडा महोत्सवास सुरूवात केली होती.
स्पर्धेच्या शेवटच्या दिवशी महाअंतिम सोहळा, बक्षिस समारंभ व महिलांसाठी ’होम-मिनिस्टर खेळ पैठणीचा“ हि विशेष स्पर्धा सुद्धा घेण्यात येणार आहे. तसेच यावेळी लकी-ड्रॉ चे आयोजन करण्यात येणार आहे. यामध्ये फ्रीज, सायकल, वॉशिंग मशीन, फूड प्रोसेसर, स्मार्ट टीव्ही, गॅस स्टोव्ह, मायक्रोवेव्ह, व्हॅक्युम क्लिनर, वॉटर प्युरिफायर, साऊंड बार, प्रिंटर अशी बक्षिसे लकी-ड्रॉ विजेत्यांना देण्यात येणार आहे. तरी जास्तीत जास्त नागरिकांनी या महोत्सवांमध्ये सहभागी व्हावे, असे आवाहन संस्कृती युवा प्रतिष्ठानचे श्री. पुर्वेश सरनाईक यांच्या माध्यमातून करण्यात आले आहे.
पुर्वेश सरनाईक यांचा वाढदिवस असतो या वाढदिवसानिमित्ताने कुणीही पुष्पगुच्छ, पुष्पहार, शाल व भेटवस्तू न देता गरीब विद्यार्थ्यांना शालेय उपयोगी साहित्य, तसेच गरजूंना अन्न-धान्य अश्या स्वरूपात साहित्य अथवा सामान मला द्यावे, जेणेकरून आपण ते त्यांच्यापर्यंत पोहचवू, असे आवाहन पुर्वेश सरनाईक यांनी यावेळी केले.