लांब पल्ल्यांच्या एसटी बसला बंदी
कल्याण : कल्याण रेल्वे स्टेशन परिसरातील वाहतूक कोंडी दूर करण्यासाठी तसेच या कामाचा वेग वाढविण्यासाठी पुढील चार महिन्याच्या कालावधीत कल्याण स्टेशन परिसरात शहराबाहेरून येणाऱ्या आणि शहराबाहेर जाणाऱ्या लांब पल्ल्याच्या एसटी बसेसना स्टेशन परिसरात प्रवेश बंदी करण्यात आली आहे. या आदेशाची अंमलबजावणी येत्या सोमवार पासून सुरू होणार असल्याची माहिती कल्याण डोंबिवली महानगरपालिका आयुक्त भाऊसाहेब दांगडे यांनी दिली.
मुरबाड, शहापूरकडून येणाऱ्या काळ्या पिवळ्या टक्सीना देखील स्टेशन परिसरात प्रवेश बंदी करण्यात आली आहे. प्रवाशांच्या सोयीसाठी या बसेसना गुरुदेव चौकात थांबा देण्यात आला आहे. तसेच लांब पल्ल्याच्या एसटी गाड्या, शहराबाहेर जाणाऱ्या बसेस त्याचप्रमाणे एनएमटीच्या बसेसना पुढील चार महिन्यासाठी दुर्गाडी तसेच गणेश घाट परिसरात थांबा देण्यात आला आहे
कल्याण स्टेशन परिसरात होणाऱ्या वाहतूक कोंडीवर तोडगा काढण्यासाठी आज पालिका मुख्यालयात आरटीओ, वाहतूक पोलीस, एसटी व्यवस्थापक, महापालिका अधिकारी, स्मार्ट सिटीचे अधिकारी, ठेकेदार, रिक्षा युनियन यांच्याबरोबर बैठक घेण्यात आली .या बैठकीत पुढील चार महिन्याच्या कालावधीत कल्याण स्टेशन परिसरात शहरा बाहेरून येणाऱ्या आणि शहराबाहेर जाणाऱ्या एसटी बसेस, केडीएमटी आणि एनएमएमटीच्या बसेसना तसेच काळी पिवळी टॅक्सीला स्टेशन परिसरात प्रवेश बंदी करण्यात आली आहे. सोमवारपासून या आदेशाची अमलबजावणी केली जाणार असल्याची माहिती आज पालिका आयुक्त डॉ. भाऊसाहेब दांगडे यांनी दिली.
लांब पल्ल्याच्या एसटी, केडीएमटी, एनएमएमटीच्या बसेस आणि काळ्या पिवळ्या टक्सीना स्टेशन परिसरात प्रवेश बंद राहणार असून त्यानाही दुर्गाडी आणि गणेश घाट परिसरात थांबा उपलब्ध करून दिला जाणार आहे. प्रवाशाच्या सोयीसाठी दुर्गाडी आणि गणेश घाट परिसरातून स्टेशनकडे येणाऱ्या मिनीबसेस उपलब्ध करून दिल्या जातील तर एसटी प्रशासनाने देखील शहरात या कालावधीत मिनिबसेस चालवाव्यात अशा सूचना त्यांना देण्यात आल्या. स्टेशन परिसरात अस्ताव्यस्त पसरलेल्या रिक्षावर आळा घालत त्यांना फक्त शेअर आणि मीटर अशा दोनच मार्गिका उपलब्ध करून द्याव्यात अशा सूचना वाहतूक पोलिसांना आयुक्तांनी दिल्या आहेत.