ठामपा मुख्यालयात शुकशुकाट
ठाणे : आयुक्त अभिजीत बांगर यांनी कारवाईचा बडगा उगारल्याने पालिका कर्मचाऱ्यांना शिस्त येऊ पाहत होती, मात्र मंगळवारी आयुक्त रजेवर जाताच मुख्यालयात पुन्हा शुकशुकाट दिसून आला.
ठाणे महापालिकेचे अनेक अधिकारी-कर्मचारी कामाच्या ठिकाणी उपलब्ध नसल्याने त्याचा फटका पालिका मुख्यालयात कामानिमित्त येणाऱ्या नागरिकांना बसत होता. नवनियुक्त आयुक्त अभिजीत बांगर यांच्या निदर्शनास ही बाब आल्यानंतर त्यांनी अशा अधिकारी-कर्मचाऱ्यांना शिस्त लावण्यासाठी कारवाईचा बडगा उगारला होता.
कार्यालयीन वेळेत आणि नेमून दिलेल्या ठिकाणी उपस्थित राहत नसलेल्या अधिकारी-कर्मचाऱ्यांची गैरहजेरी लावण्यास सुरुवात केली होती. तसेच उशीरा येऊन हजेरी वहीत अधिकारी-कर्मचाऱ्यांनी स्वाक्षरी करू नये म्हणून कार्यालयीन वेळेनंतर काही मिनिटांनी हजेरी नोंद वही विभाग प्रमुखांकडून ताब्यात घेतली जात आहे. यानंतरही सातत्याने उशीरा येणाऱ्या ३५ अधिकारी-कर्मचाऱ्यांना आयुक्तांनी कारणे दाखवा नोटीसा बजावल्या होत्या. या कारवाईनंतर अनेक अधिकारी-कर्मचारी कार्यालयीन वेळेत कामावर उपस्थित राहत असल्याचे चित्र आहे.
अधिकारी-कर्मचारी उपस्थित असल्यामुळे नागरिकही कामानिमित्त सकाळपासूनच येत असून यामुळे पालिका मुख्यालय सकाळपासूनच गजबजलेले असल्याचे दिसून येत होते. परंतु मंगळवारपासून आयुक्त बांगर हे सुट्टीवर जाताच पालिका मुख्यालयात अनेक अधिकारी-कर्मचारी कार्यालयात उपस्थित नसल्यामुळे पालिका मुख्यालयात शुकशुकाट दिसत होता.