* ठाण्यात १०.४ तर कडोंमपा आणि उल्हासनगरात २७ टक्के आरक्षण
* आजच्या सोडतीकडे इच्छुकांचे लक्ष
ठाणे : ठाणे जिल्ह्यातील ठाणे, कल्याण-डोंबिवली आणि उल्हासनगर या महापालिकांच्या ओबीसी, नागरिकांचा मागासवर्ग प्रवर्ग, नागरिकांचा मागासवर्ग प्रवर्ग (महिला) आणि सर्वसाधारण महिलांसाठी उद्या आरक्षण सोडत जाहीर होणार आहे.
सर्वोच्च न्यायालयाच्या निर्णयानंतर निवडणूक आयोगाने आरक्षण संदर्भात निर्देश दिले होते. त्यानुसार हे आरक्षण आज जाहीर होणार असून यामध्ये ठाणे महापालिका १०.४ टक्के तर कल्याण-डोंबिवली आणि उल्हासनगर महापालिकेसाठी २७ टक्के आरक्षण काढले जाणार आहे. त्यामुळे पुन्हा एकदा इच्छुकांची धाकधूक वाढली आहे.
ठाणे महापालिकेच्या डॉ. काशिनाथ घाणेकर नाट्यगृह येथे सकाळी ११ वाजता आरक्षण सोडत काढण्यात येणार आहे. शनिवार ३० जुलै रोजी आरक्षणाचे प्रारुप प्रसिध्द करण्यात येणार आहे. शनिवार ३० जुलै ते २ ऑगस्ट रोजी दुपारी ३ वाजेपर्यंत आरक्षणाबाबत हरकती व सूचना सादर करण्यासाठी कालावधी देण्यात आला आहे. कल्याण-डोंबिवली पालिकेची आरक्षण सोडत प्रक्रीया सकाळी ११ वाजता कल्याणमधील आचार्य अत्रे नाट्यगृह येथे पार पडणार आहे. नागरिकांचा मागासवर्ग प्रवर्ग, नागरिकांचा मागासवर्ग प्रवर्ग (महिला) आणि सर्वसाधारण महिलांसाठी आरक्षण निश्चित करण्यात येणार आहे. यापुर्वी सर्वसाधारण महिला आणि पुरुषांसाठी जागा आरक्षित झाल्या असून त्यामध्येच आता ओबीसी आरक्षण सोडत काढण्यात येणार आहे. त्यामुळे इच्छूकांचे आरक्षण सोडतीकडे लक्ष लागले असून या प्रक्रीयामुळे त्यांची धाकधूक वाढली आहे.
ठाणे महापालिकेत एकूण नगरसेवक संख्या १४२ इतकी आहे. बांठीया आयोगानुसार ठाणे महापालिका क्षेत्रात १०.४ टक्के इतके आरक्षण लागू होणार आहे. यामुळे ओबीसी समाजाला १५ जागा मिळणार असून त्यापैकी आठ जागा राखीव असणार आहेत. कल्याण-डोंबिवली महापालिकेत १३३ इतकी आहे. याठिकाणी २७ टक्के इतके ओबीसी समाजाला आरक्षण मिळणार आहे. यामुळे ओबीसी समाजाला ३५ जागा मिळणार असून त्यापैकी १८ जागा महिलांसाठी राखीव असणार आहेत. तर, उल्हानगर पालिकेत एकूण नगरसेवक संख्या ८९ इतकी आहे. याठिकाणी २७ टक्के इतके आरक्षण लागू होणार असून त्यानुसार ओबासी समाजाला २४ जागा मिळणार आहेत. त्यापैकी १२ जागा महिलांसाठी राखीव असणार आहेत.