मुंबई : महाराष्ट्रात एकीकडे एकनाथ शिंदे यांच्या बंडामुळे राजकीय भूकंप झालेला असताना दुसरीकडे परिवहन मंत्री अनिल परब यांच्यावर अटकेची टांगती तलवार आहे. सकाळी ११ वाजल्यापासून अनिल परब यांची रात्री उशिरापर्यंत चौकशी सुरू आहे. चौकशी संपल्यानंतर अनिल परब यांना अटक होण्याची शक्यता आहे. अनिल परब यांचे समर्थक ईडी कार्यालयासमोर जमले होते.
अनिल परब यांच्याशी संबंधित विविध ठिकाणांवर २७ मे रोजी ईडीने छापेमारी केली होती. त्यानंतर त्यांना काही दिवसांपूर्वीच ईडीने चौकशीसाठी बोलावलं होतं. मात्र ते गेले नाहीत. आज एकीकडे हाय व्होल्टेज ड्रामा सुरू असताना दुसरीकडे अनिल परब हे ईडी कार्यालयात चौकशीसाठी गेले होते. ही चौकशी संपलेली नाही. आज अनिल परब यांना अटक होण्याची शक्यता आहे.
अनिल परब यांचं रिसॉर्ट ईडीच्या रडारवर आहे, तेही तपासण्यात आलं आहे. याच रिसोर्टच्या आधारे ईडीने छापेमारी केली आहे, तसंच चौकशीही सुरू करण्यात आली आहे..याआधी ८ मार्चला आयकर विभागाने मुंबईतल्या एका केबल ऑपरेटवरवर तसंच वाहतूक विभागातील एक कर्मचारी आणि त्याच्याशी संबंधित व्यवसायांवर शोध मोहीम राबवली होती.
मुंबई, पुणे, सांगली आणि रत्नागिरी अशा २६ ठिकाणी छापेमारी करण्यात आली. या सगळ्या प्रकरणाची चौकशी करत असताना दापोली येथील जमीनाचा काही भाग २०१७ मध्ये अनिल परब यांनी १ कोटी रूपयांना खरेदी केल्याचं आढळून आलं. या मालमत्तेची नोंदणी २०१९ मध्ये झाली होती असंही समोर आलं.
सदर जमीन नंतर 2020 मध्ये शोध कारवाईमध्ये समाविष्ट असलेल्या व्यक्तींपैकी एकाला 1.10 कोटी रुपयांच्या मोबदल्यात विकली गेली.
सदरची जमीन तीच आहे ज्यावर २०१७ ते २०२० या कालावधीत रिसॉर्ट बांधण्यात आलं. अनिल परब यांच्याववर जमिनीची नोंदणी होईपर्यंत रिसॉर्टच्या बांधकामाचा मोठा भाग बांधून पूर्ण झाला होता. नंतर २०२० मध्ये जेव्हा ही प्रॉपर्टी विकण्यात आली तेव्हा रिसॉर्टचं काम पूर्ण झालं होतं. त्यामुळे हे रिसॉर्टच अनिल परब यांच्यावर झालेल्या कारवाईचं मूळ ठरलं.
सर्वात महत्त्वाची बाब ही की रिसॉर्टच्या बांधकामाची माहिती नोंदणी अधिकाऱ्यांना देण्यात आली नाही. त्यामुळेच या रिसॉर्टची चर्चा झाली आणि त्यावरून कारवाई सुरू झाली.
आयकर विभाग शोध घेत असताना आढळलेल्या पुराव्यांवरून हे दिसून आलं की रिसॉर्टचं बांधकाम २०१७ मध्ये सुरू झालं आणि या रिसॉर्टच्या बांधकामासाठी ६ कोटी रूपयांपेक्षा जास्त खर्च झाला. तया बांधकामाचा खर्च केबल ऑपरेटर आणि अनिल परब यांच्या हिशोबाच्या खात्यात नाही. त्यामुळेच रिसॉर्टवरून अनिल परब अडचणीत आले.