अंबरनाथ : इमारतीच्या दुसऱ्या माळ्यावरून लिफ्ट कोसळून सात महिला जखमी झाल्याची घटना अंबरनाथच्या नीलयोग परिसरात घडली. दोन महिलांच्या पायाला गंभीर स्वरूपाची इजा झाली आहे.
अंबरनाथच्या पूर्व भागातील निलयोगनगर परिसरात अनिता इमारतीमध्ये सोमवार (२१) रोजी दुसऱ्या मजल्यावरील एका घरी गाण्याच्या सरावासाठी सात महिला एकत्रित गेल्या होत्या. तिथून खाली येताना सायंकाळी पाचच्या दरम्यान लिफ्ट अतिशय वेगात खाली येऊन कोसळली. या अपघातात दोन महिलांना गंभीर दुखापत झाली आहे. त्यांचे पाय जागीच मोडले. तर इतर महिलांनाही किरकोळ इजा झाल्या.
या महिलांनी आरडाओरडा केल्यानंतर सोसायटीतल्या रहिवाशांनी तिथे धाव घेत त्यांना बाहेर काढले आणि रुग्णालयात दाखल केले. दरम्यान, लिफ्टमध्ये प्रमाणापेक्षा जास्त महिला शिरल्याने लिफ्ट कोसळल्याचे इमारतीचे विकसक ज्ञानधर मिश्रा यांनी सांगितले. या महिलांना सोसायटीतील सदस्यांनी यापूर्वीही दोन वेळा समज दिली होती, मात्र तरीही क्षमतेपेक्षा जास्त महिला एकाच वेळी लिफ्टमध्ये गेल्याने हा अपघात झाल्याचे ते म्हणाले.
इमारत सोसायटीकडे हस्तांतरित केलेली असून सोसायटीकडून लिफ्टचे मेंटेनन्स सुद्धा केले जात असल्याची माहिती श्री. मिश्रा यांनी दिली. या घटनेनंतर रुग्णालयात दाखल करण्यात आलेल्या विद्या सुर्वे यांच्या पायावर शस्त्रक्रिया करण्यात आली आहे तर सुमन दास यांच्याही पायावर शस्त्रक्रिया करण्यात येणार आहे.
लिफ्ट खाली येत असताना अचानक लिफ्टचा वेग जास्त वाढला आणि ती खाली कोसळली. क्षणभर काहीच कळले नाही असे घटनेत जखमी झालेल्या विद्या सुर्वे यांनी सांगितले.