राणे बंधुंविरुद्ध ठाण्यात फिर्याद

शरद पवारांबद्दल आक्षेपार्ह विधान

ठाणे : राष्ट्रवादी काँग्रेसचे राष्ट्रीय अध्यक्ष शरद पवार यांना दाऊदचा हस्तक आणि पाकिस्तानचा एजंट असे संबोधन वापरणार्या आमदार नितेश राणे व माजी खासदार निलेश राणे यांच्यावर नौपाडा पोलीस ठाण्यात राष्ट्रवादी काँग्रेसने गुन्हा दाखल करण्यासाठी गृहनिर्माण मंत्री ना.डाॅ. जितेंद्र आव्हाड यांच्या मार्गदर्शनाखाली लेखी फिर्याद
दिली आहे.

नौपाडा पोलिसांनी या प्रकरणात योग्य ते गुन्हे दाखल करण्यासंदर्भात शहराध्यक्ष आनंद परांजपे यांना आश्वासित केले आहे. माजी खासदार निलेश राणे यांनी ट्वीट करून शरद पवार हे दाउदचे हस्तक असल्याचे म्हटले होते. तर निलेश राणे यांनी पत्रकार परिषद घेऊन निलेश राणे यांच्या ट्वीटची री ओढत शरद पवार यांना दाऊदचा हस्तक तसेच पाकिस्तानी एजंट असे संबोधन केले होते. त्यामुळे राष्ट्रवादी काँग्रेसच्या कार्यकर्त्यांमध्ये प्रचंड संतापाचे वातावरण निर्माण झाले आहे. त्याच अनुषंगाने आज राष्ट्रवादीचे शहराध्यक्ष आनंद परांजपे यांच्या नेतृत्वाखाली राष्ट्रवादीच्या शेकडो कार्यकर्त्यांनी नौपाडा पोलीस स्टेशन गाठले. हरी निवास सर्कल ते पोलीस ठाणे असे चालत जावून भादंवि 120 ब, 153, 153(अ), 499, 500, 505 (1), 505 (1) क, अन्वये गुन्हा दाखल करावा, अशी मागणी लेखी फिर्यादीद्वारे राष्ट्रवादी काँग्रेसने केली आहे.

यावेळी विद्यमान विरोधी पक्षनेते शानू पठाण, परिवहन सदस्य प्रकाश पाटील, ठाणे महिलाध्यक्षा सुजाताताई घाग यांच्यासह राष्ट्रवादीच्या जिल्हा कार्यकारिणीचे सर्व सदस्य, महिला कार्यकारिणीच्या सर्व सदस्या, युवक कार्यकारिणीचे सर्व पदाधिकारी व कार्यकर्ते मोठ्या संख्येने उपस्थित होते.