खासदार राजन विचारे यांच्याकडून पाहणी
ठाणे : ठाणे शहराच्या मध्यभागी असलेल्या टेंभीनाका येथे उभय राहत असलेल्या बीजे हायस्कूलच्या इमारतीचे काम अंतिम टप्प्यात असून येत्या १५ दिवसात त्याचे लोकार्पण होऊ शकते, अशी माहिती खासदार राजन विचारे यांनी दिली.
खासदार विचारे यांनी आज केलेल्या पाहणी दोऱ्यात जिल्हा परिषदेचे मुख्य कार्यकारी अधिकारी डॉ. भाऊसाहेब दांगडे, नगरसेवक सुधीर कोकाटे उपस्थित होते.
टेंभी नाका येथील १५० वर्षाची परंपरा असलेल्या बी. जे. हायस्कूलच्या इमारतीचे बांधकाम सन १८७२ मध्ये केलेले होते. मूळ इंग्लिश स्कुल असलेली ही शाळा १४ ऑगस्ट १८८० मध्ये सर बैरामजी जीजीभाय ट्रस्टने रहते घर, जमीन, रोख रक्कम शाळेसाठी दानपत्र करूंन शासनाकडे दिली होती, त्यामुळे या शाळेचे नाव बैरामजी जीजीभाय ठाणा हायस्कूल (बीजे हायस्कूल) करण्यात आले.
या शाळेमध्ये बाळ गंगाधर टिळक, आचार्य श्री. भिसे, आचार्य श्री. दोंदे, स्वातंत्र्य सेनानी दत्ताजी ताम्हाणे, कृष्णाजी दामले, मुंबई राज्याचे पहिले अर्थमंत्री गोविंदराव प्रधान, क्रिकेटपटू खंडू रांगणेकर, ज्येष्ठ विधीतज्ञ माधवराव हेगडे, प्रभाकर हेगडे, माजी आमदार विमल रांगणेकर, कावेरी पाटील, चंपु मोकल, कुसुम शालीग्राम, सारस्वतकार श्री. वि. ल. भावे, श्री. वामन रेगे, उच्च न्यायालयाचे माजी न्यायाधीश श्री. दिघे, माजी महापौर मोहन गुप्ते, अशोक राउळ, मनोहर गाढवे, ज्येष्ठ वकील रमाकांत ओवळेकर, डॉ. बाबा कारखानीस, डॉ. प्रभाकर भागवत, डॉ. हजरनीस, प्रसिद्ध क्रिकेट समीक्षक सुधीर वैद्य, विजय दप्तरदार, प्रध्यापक दाउद दळवी, अशा थोर व्यक्तींनी या शाळेत शिक्षण घेतल्याचा इतिहास आहे.
सन १९८४ साली शाळा धोकादायक झाल्याने ही इमारत पाडण्यात आली. तेव्हापासून या कामाला निधी मिळत नसल्याने काम रखडले होते. खासदार राजन विचारे यांनी आमदार असताना अधिवेशनामध्ये याचा पाठपुरावा करून शासनाकडून 14 कोटी 35 लाखांचा निधी उपलब्ध करून काम सुरू करून घेतले. त्याचे भूमिपूजन खासदार झाल्यानंतर २१ डिसेंबर २०१४ रोजी करण्यात आले होते. त्यावेळी या इमारतीच्या बांधकामाला लागणाऱ्या सर्व परवानग्या महापालिकेकडून खासदार राजन विचारे यांनी मिळवून दिल्या. परंतु मधल्या काळात वास्तुविशारद ठेकेदारांच्या आडमुठेपणामुळे हे काम वेळेत पूर्ण झाले नाही.
या पाहणी दौऱ्यात खासदार राजन विचारे यांनी जिल्हा परिषदेचे मुख्य कार्यकारी अधिकारी डॉ. भाऊसाहेब दांगडे यांना नव्याने झालेल्या इमारतींमध्ये अत्याधुनिक पद्धतीची बेंचस, डिजिटल बोर्ड व इतर लागणाऱ्या सुविधांचा समावेश तत्काळ करून घ्या येत्या 15 दिवसात या इमारतीचे आपण लोकार्पण करू असे खासदारांकडून सांगण्यात आले.