जंगली पिक्चर्स आता नक्कीच गियरमध्ये आली असून गेल्या आठवड्यात ‘बधाई दो’च्या प्रदर्शनाची तारीख (प्रजासत्ताक दिन वीकेंड) जाहीर केल्यानंतर, स्टुडिओने आता आयुष्मान खुराना, रकुल प्रीत सिंग आणि शेफाली शाह यांच्या बहुप्रतिक्षित ‘डॉक्टर जी’ चित्रपटाच्या थिएट्रीकल प्रदर्शनाची 17 जून 2022 ही तारीख आज जाहीर केली.
कॅम्पस कॉमेडी ड्रामामध्ये रकुल आणि ज्येष्ठ अभिनेत्री शेफाली शाह यांच्यासोबत आयुष्मान पहिल्यांदाच स्त्रीरोगतज्ज्ञाची भूमिका साकारताना पाहणे मनोरंजक असणार आहे. ‘बरेली की बर्फी’ (2017) आणि ‘बधाई हो’ (2018) या दोन यशस्वी सहकार्यानंतर, आयुष्मान आणि जंगली पिक्चर्स हे दोघे बॉक्स ऑफिसवर हॅटट्रिक करण्यासाठी पुन्हा एकदा एकत्र येत आहेत.
जंगली पिक्चर्सच्या अमृता पांडे म्हणाल्या की, “चित्रपटाचे लेखक – सुमित, सौरभ आणि विशाल यांनी अनुभूतीसह ‘डॉक्टर जी’ ची एक अप्रतिम स्क्रिप्ट तयार केली असून अनुभूतीने ती पुढच्या स्तरावर नेली आहे. पुढच्या वर्षी १७ जूनला ती चित्रपटगृहात आणण्यासाठी आम्ही उत्सुक आहोत.”
चित्रपटाद्वारे दिग्दर्शनात पदार्पण करणारी अनुभूती कश्यप म्हणते की, “चित्रपटाचे चित्रीकरण पूर्ण झाल्यानंतर, आम्ही आता चित्रपटगृहांमध्ये येण्यासाठी सज्ज झालो आहोत. आयुष्मान, रकुल, शेफाली, जंगली आणि माझ्या पाठीशी उभे राहिलेल्या ‘डॉक्टर जी’ च्या संपूर्ण टीमसोबत काम करण्याची संधी मिळाल्याने मला खूप आनंद झाला आहे आणि ते पडद्यावर दिसून येईल. तो एक समृद्ध करणारा अनुभव आहे. हा चित्रपट प्रेक्षकांसमोर आणण्यासाठी मी खूप उत्सुक आहे.
अनुभूती कश्यप दिग्दर्शित, ‘डॉक्टर जी’ हा कॅम्पस कॉमेडी ड्रामा आहे, ज्याचे सहलेखन तिच्यासह, सुमित सक्सेना, विशाल वाघ आणि सौरभ भारत यांनी केले आहे. आयुष्मान खुराना, रकुल प्रीत सिंग आणि शेफाली शाह यांच्या प्रमुख भूमिका असलेला ‘डॉक्टर जी’ 17 जून 2022 रोजी सिनेमागृहात प्रदर्शित होणार आहे.