पालिकेचा अर्थसंकल्प गेला ३ हजार ३८४ कोटींवर
ठाणे : ठाणे पालिका आयुक्त डॉ विपीन शर्मा यांनी सादर केलेला ३ हजार २९९ कोटींच्या मूळ अर्थसंकल्पात स्थायी समितीने ८५ कोटींची वाढ सुचवली असून यामध्ये प्रामुख्याने शहर विकास विभागाकडून वाढीव उत्पन्न अपेक्षित धरले आहे. शहर विकास विभागाकडून प्रशासनाने ५०० कोटी ४२ लाख उत्पन्न अपेक्षित धरले होते. त्यामध्ये स्थायी समितीकडून ८५ कोटींची वाढ करण्यात आल्याने या विभागाचे अपेक्षित उत्पन्न हे ५८५ कोटी ४२ लाख धरण्यात आले आहे. त्यामुळे पालिकेचे सन २०२२-२३ चे मूळ अंदाजपत्रक हे ३ हजार ३८४ कोटींच्या घरात गेले आहे. दुसरीकडे सन २०२२-२३ च्या अंदाजपत्रकात ४० कोटी ५२ लाख महसुली खर्चात तर ४४ कोटी ४८ लाख भांडवली खर्चात वाढ सुचविण्यात आली आहे.
कोणत्याही प्रकारची करवाढ न करता २०२२-२३ चा ३ हजार २९९ कोटींचा अर्थसंकल्प पालिका आयुक्त डॉ.विपीन शर्मा यांनी स्थायी समिती सभापती संजय भोईर यांना सादर केला. गेल्या वर्षी १३०० कोटी तुटीच्या असलेल्या अर्थसंकल्पात यावर्षी मात्र ५४५ कोटींनी वाढ झाली आहे. मागील वर्षी प्रमाणेच यावर्षीही नव्या मोठ्या प्रकल्पांची घोषणा न करता ठाणे महापालिकेवर असलेले दायित्व कमी करण्यावर या अर्थसंकल्पात भर देण्यात आला आहे. स्थायी समितीला अर्थसंकल्प सादर केल्यानंतर स्थायी समितीने अर्थसंकल्पात काही महत्वाचे बदल सुचवले असून यामध्ये ८५ कोटींची वाढ सुचवत ३ हजार ३८४ कोटींवर बजेट अंतिम केला आहे. वाढ सुचविण्यात आलेल्या महसुली खर्चामध्ये प्रामुख्याने मोबाईल डायग्नोस्टीक व्हॅनसाठी १ कोटी, पशुजन्म नियंत्रण योजनेसाठी १ कोटी, जंतुनाशकांसाठी ५० लाख, महापौर चषक क्रीडास्पर्धांसाठी १ कोटी, इमारतींच्या दुरुस्तीसाठी २ कोटी ५० लाख, बीएसयुपी झोपडीधारकांना भाडे देण्यासाठी ५० लाख, बागांची निगा व देखभालीसाठी १ कोटी, जलवाहिन्या व जलकुंभ दुरुस्तीसाठी १ कोटी, स्मार्ट मीटर देखभाल दुरुस्तीसाठी ३ कोटी, मलवाहिन्या देखभाल व दुरुस्तीसाठी १ कोटी व महापालिका शाळांमध्ये १० योग केंद्र सुरु करण्यासाठी ५० लाख इत्यादींचा समावेश आहे.
सन २०२२-२३ मधील वाढ सुचविण्यात आलेल्या भांडवली कामांसाठी एकात्मिक उद्यान विकास कार्यक्रमासाठी २ कोटी, अभ्यासिका बांधण्यासाठी १ कोटी, बहुउद्देशीय इमारत बांधण्यासाठी १कोटी, छत्रपती शिवाजी महाराज व डॉ. बाबासाहेब आंबेडकर स्मारकासाठी १ कोटी ७६ लाख, विकास आराखडयातील रस्ते नुतनीकरणासाठी ३ कोटी, युटीडब्ल्यूटी रस्त्यांसाठी १० कोटी ५० लाख, मैदान विकासासाठी २ कोटी, सार्वजनिक शौचालये बांधण्यासाठी ४ कोटी इत्यादी प्रमुख बाबींमध्ये वाढ सुचविण्यात आलेली आहे. महिलांसाठी सार्वजनिक ठिकाणी स्वतंत्र कक्ष तयार करुन खोली ‘तीच्यासाठी” ही संकल्पना राबविण्यासाठी सार्वजनिक शौचालय बांधणे या लेखाशीर्षामध्ये ५० लाखाची तरतूद राखून ठेवण्यात आली आहे. स्थायी समितीचे अंदाजपत्रक तयार करतांना स्थायी समिती सदस्यांनी जे सहकार्य केले त्याबद्दल सभापती संजय भोईर यांनी सर्वांचे कौतुक केले आहे.