भिवंडीत समाजवादी पक्षाच्या उमेदवारांची काँग्रेसमध्ये घुसखोरी
भिवंडी: १५ जानेवारी रोजी होणाऱ्या भिवंडी महानगरपालिकेच्या निवडणुकीसाठी काँग्रेस पक्षाने ६० उमेदवार उभे केले आहेत. काँग्रेसने उभे केलेले बहुतेक उमेदवार सपाचे आमदार रईस शेख यांच्या पाठिंब्यावर अवलंबून आहेत. सपाचे आमदार रईस शेख यांनी भिवंडी काँग्रेस पक्षाला हायजॅक करण्यात कोणतीही कसर सोडली नाही.
१५ जानेवारी रोजी होणाऱ्या भिवंडी महानगरपालिकेच्या निवडणुकीत काँग्रेस पक्षाने ६० उमेदवार उभे केले आहेत. त्यातच काँग्रेसचे प्रदेशाध्यक्ष हर्षवर्धन सपकाळ यांच्यासह वरिष्ठ नेत्यांच्या गटाशी संगनमत करून आमदार रईस शेख यांनी समाजवादी पक्षाने तिकीट न दिलेल्या उमेदवारांना काँग्रेसची तिकिटे मिळवून दिली. त्यामुळे शहरातील राजकीय पटलावर वेगळे चित्र निर्माण झाले आहे. त्याचबरोबर शहरातील सर्व जुन्या काँग्रेसजनांना आश्चर्यांचा धक्का बसला आहे. काँग्रेस पक्षाने जाहीर केलेल्या यादीतील सुमारे ३५ ते ४० समाजवादी पक्षाच्या उमेदवारांच्या विजयासाठी सपाचे आमदार रईस शेख लॉबिंगमध्ये व्यस्त आहेत. तर जिल्हाध्यक्ष अॅड. रशीद ताहिर मोमीन काँग्रेसने तिकीट दिलेल्या उमेदवारांसाठी देखील लॉबिंग करत आहेत आणि ते काँग्रेसच्या विजयासाठी प्रयत्न करीत आहेत.
या बाबत स्थानिक लोकांचे म्हणणे आहे की, सपाचे आमदार काँग्रेस उमेदवारांचा विजय निश्चित करण्यासाठी मतदारांना एकत्र करत आहेत. विधानसभा निवडणुकीत निवडून आलेल्या समाजवादीचे आमदार रईस शेख यांनी उचललेल्या या धाडसी पावलांमुळे सपा कार्यकर्त्यांमध्ये खळबळ माजली असून याबाबत कारवाई करण्यासाठी समाजवादी पक्षाच्या वरिष्ठ पदाधिकाऱ्यांमध्ये बैठका व चर्चा सुरु झाल्या आहेत.