गेटवे ऑफ इंडिया ते ट्रॉम्बे जेट्टी आणि पुन्हा गेटवे ऑफ इंडिया केले पार
कल्याण: स्वरा सावंत ही १९ वर्षीय आणि रामनारायण रुइया स्वायत्त महाविद्यालयमधील प्रथम वर्षाची विद्यार्थिनी असून तिने भारतीय खुल्या समुद्रात पोहण्याची कामगिरी केली आहे. स्वराने गेटवे ऑफ इंडिया ते ट्रॉम्बे जेट्टी आणि पुन्हा गेटवे ऑफ इंडिया असा अखंड एकल समुद्र पोहण्याचा ४० कि.मी.चा पराक्रम यशस्वीरित्या पूर्ण करून इतिहास घडवला आहे.
स्वराने हा अत्यंत कठीण ४० कि.मी.चा अरबी समुद्रातील प्रवास अवघ्या नऊ तास ३९ मिनिटांत पूर्ण केला. संपूर्ण पोहण्यादरम्यान तिने अफाट सहनशक्ती, मानसिक ताकद, जिद्द आणि चिकाटीचे उत्कृष्ट प्रदर्शन केले. ही पोहण्याची मोहीम सकाळी ९.३० वाजता गेटवे ऑफ इंडिया येथून सुरू झाली आणि सायंकाळपर्यंत सुरू राहून स्वराने पुन्हा गेटवे ऑफ इंडिया येथे यशस्वीरीत्या समाप्त केली. यादरम्यान तिला जोरदार वारे, उंच लाटा, भरती-ओहोटीचे तीव्र प्रवाह आणि खवळलेला समुद्र अशा अत्यंत आव्हानात्मक परिस्थितीचा सामना करावा लागला. कडक उन्हामुळे ही मोहीम अधिकच कठीण बनली होती. विशेष बाब म्हणजे, हा स्वराचा पहिलाच एकल अल्ट्रा-डिस्टन्स समुद्र पोहण्याचा प्रयत्न होता. प्रतिकूल परिस्थितीतही स्वराने उल्लेखनीय धैर्य, सातत्य आणि मानसिक स्थैर्य दाखवत संपूर्ण पोहण्याची मोहीम यशस्वीरित्या पूर्ण केली. स्वरा रुपाली रेपाळे स्विमिंग अकादमी येथे प्रशिक्षण घेत असून तिचा सराव रामचंद्र ठाकूर जलतरण तलाव येथे होतो. ती दररोज सुमारे ३ ते ४ तास कठोर प्रशिक्षण घेते. वयाच्या १० व्या वर्षापासून तिने पोहण्यास सुरुवात केली आणि पुढे खुल्या समुद्रातील पोहण्याबद्दल तिची विशेष आवड निर्माण झाली.
स्वराने राष्ट्रीय आणि आंतरराष्ट्रीय स्तरावरही उल्लेखनीय कामगिरी केली आहे. तिच्या प्रमुख यशामध्ये यावर्षी कोची येथे आयोजित करण्यात आलेल्या प्रतिष्ठित १६.१ कि.मी. ओपन नॅशनल फ्रेशवॉटर स्विमॅथॉन स्पर्धेत द्वितीय क्रमांक, ओशनमन-थायलंड या आंतरराष्ट्रीय खुल्या पाण्यातील पोहण्याच्या स्पर्धेत द्वितीय क्रमांक, विविध राज्यस्तरीय खुल्या पाण्यातील स्पर्धांमध्ये अनेक उल्लेखनीय यश प्राप्त केले आहे. हा विक्रम महाराष्ट्र राज्य हौशी जलक्रीडा संघटना यांच्या अधिकृत देखरेखीखाली आणि सर्व नियमांचे पालन करून पार पडला.
विक्रम पूर्ण झाल्यानंतर स्वराने आपल्या आई-वडिलांचे त्यांच्या सातत्यपूर्ण पाठिंबा आणि प्रोत्साहनासाठी मनःपूर्वक आभार मानले. तसेच तिचे प्रशिक्षक रुपाली रेपाळे आणि अनिरुद्ध महाडिक यांचे मार्गदर्शन, प्रशिक्षण आणि सततच्या प्रेरणेसाठी विशेष आभार व्यक्त केले. याशिवाय परिवहनमंत्री प्रताप सरनाईक यांनी दिलेल्या प्रोत्साहनाबद्दल आणि प्रशिक्षणासाठी जलतरण तलाव उपलब्ध करून दिल्याबद्दलही तिने कृतज्ञता व्यक्त केली.