अंतिम फेरीत RCBचा प्रतिस्पर्धी कोण? गुजरात की दिल्ली!

वुमन्स प्रीमियर लीग (WPL) 2026 मधील एलिमिनेटर सामना मंगळवारी वडोदऱ्यातील कोटांबी स्टेडियमवर रंगणार आहे. हा गुजरात जायंट्स आणि दिल्ली कॅपिटल्स यांच्यातील हंगामातील तिसरा आणि अखेरचा सामना असून, यावेळी थेट अंतिम फेरीचे तिकीट पणाला लागले आहे. या मोसमात जायंट्सने कॅपिटल्सवर दोनदा मात केली आहे. त्यामुळे सलग तिसरा विजय मिळवत WPL च्या इतिहासातील पहिल्याच अंतिम फेरीत प्रवेश करण्याची संधी गुजरातसाठी सुवर्णसंधी ठरणार आहे. मात्र दिल्ली कॅपिटल्ससमोरचे आव्हान तितकेच कठीण आहे. आजवर WPL मध्ये प्रत्येक वेळी अंतिम फेरी गाठणारा हा संघ, ओळखीच्या प्रतिस्पर्ध्याविरुद्ध आपली परंपरा कायम राखण्याच्या निर्धाराने मैदानात उतरेल. या सामन्यातील विजेता संघ गुरुवारी, याच मैदानावर होणाऱ्या अंतिम सामन्यात WPL 2024 विजेत्या रॉयल चॅलेंजर्स बेंगळुरूशी भिडणार आहे. जायंट्स आणि कॅपिटल्स यांच्यातील या मोसमातील दोन्ही सामन्यांकडे नजर टाकल्यास एक बाब ठळकपणे दिसून येते — जायंट्सने दोन्ही वेळा धावांचा बचाव करत विजय मिळवला आहे. यामुळे धावांचा पाठलाग करताना कॅपिटल्ससमोरील अडचणी स्पष्ट होतात. दोन्ही सामने अत्यंत चुरशीचे होते; मात्र तीन आणि चार धावांनी झालेल्या पराभवांमुळे कौशल्यापेक्षा मानसिक कणखरतेचा मुद्दा अधिक ठळकपणे समोर येतो. अशा तंग सामन्यांत खेळाडूंची मानसिक ताकदच निकाल ठरवते, हेच क्रिकेटचे खरे गमक आहे. निकालांपलीकडे पाहिले तर जायंट्स आणि कॅपिटल्स यांच्यातील लढतींनी चाहत्यांना भरपूर मनोरंजन दिले आहे. नंदिनी शर्माची थरारक हॅट्ट्रिक आणि पाच विकेट हॉल असो, वा सोफी डिव्हाईनने अवघ्या 42 चेंडूंमध्ये साकारलेली 95 धावांची वादळी खेळी — या दोन संघांच्या भेटींनी नेहमीच रंगत वाढवली आहे. वडोदऱ्यातील कोटांबी स्टेडियमवर मात्र दोन्ही संघांना जवळपास समान यश मिळाले आहे. गुजरात आणि दिल्ली या दोघांनीही येथे चार पैकी तीन सामने जिंकले आहेत. जायंट्ससाठी या मैदानावर डिव्हाईन चमकदार ठरली आहे. स्पर्धेतील सर्वात यशस्वी गोलंदाज डिव्हाई हिने येथे नऊ विकेट्स घेतले आहेत (दिल्लीविरुद्ध चार विकेट्स). दुसरीकडे, दिल्लीसाठी अनुभवी मारिझान कापने सात विकेट्स घेत संघाला भक्कम साथ दिली आहे. परदेशी खेळाडूंइतकेच भारतीय खेळाडूही या सामन्याचा कल ठरवू शकतात. दिल्लीची आक्रमक सलामीवीर शफाली वर्मा हिला या मोसमातील दोन्ही सामन्यांत पॉवरप्लेच्या आतच डावखुऱ्या फिरकीपटू राजेश्वरी गायकवाडने बाद केले आहे. त्यामुळे पहिल्या सहा षटकांतील ही लढत पुन्हा एकदा सामन्याचे चित्र बदलू शकते. कर्णधारांची भूमिकाही निर्णायक ठरणार आहे. दिल्लीची कर्णधार आणि मुंबईकर जेमिमा रोड्रिग्स हिने नवी मुंबईपेक्षा वडोदऱ्यात अधिक प्रभावी कामगिरी केली असून, चार डावांत 125 धावा, त्यात दोन नाबाद खेळी, केल्या आहेत. गुजरातची कर्णधार ऍश्ले गार्डनर हिने अष्टपैलू योगदान दिले आहे — येथे खेळलेल्या चारही सामन्यांत किमान एक विकेट घेताना तिने 107 धावाही केल्या आहेत, ज्यात एका अर्धशतकाचा समावेश आहे. या सामन्याला आणखी धार देणारी पार्श्वभूमीही तितकीच रंजक आहे. WPL च्या पहिल्या दोन हंगामांत तळाशी राहिलेल्या जायंट्सने मागील हंगामात जोरदार पुनरागमन करत प्ले-ऑफमध्ये प्रवेश केला होता; मात्र एलिमिनेटरमध्ये त्यांना मुंबई इंडियन्सकडून पराभव पत्करावा लागला. त्याउलट, दिल्ली कॅपिटल्सने आजवर प्रत्येक हंगामात अंतिम फेरी गाठली असली, तरी एलिमिनेटर खेळण्याचा अनुभव त्यांना प्रथमच येणार आहे. मागील तिन्ही हंगामांत दिल्लीने गुणतालिकेत अव्वल स्थान पटकावत थेट फायनलचे तिकीट मिळवले होते, त्यामुळे त्यांना कधीही एलिमिनेटर खेळण्याची वेळच आली नव्हती. अंतिम फेरीचे स्वप्न प्रत्यक्षात उतरवण्यासाठी आता कोणतीही तडजोड शक्य नाही. गुजरात जायंट्स आणि दिल्ली कॅपिटल्स यांच्यात ‘करो किंवा मरो’ अशी झुंज पाहायला मिळणार आहे — जिथे एक संघ गौरवाच्या आणखी जवळ जाईल, तर दुसऱ्या संघाचा प्रवास इथेच थांबेल.   आमने-सामने (मागील 5 सामने) गुजरात जायंट्स – 3 | दिल्ली कॅपिटल्स - 2   सामन्याची थोडक्यात माहिती दिनांक: 3 फेब्रुवारी 2026 वेळ: संध्याकाळी 7:30 वाजता स्थळ: कोटांबी स्टेडियम, वडोदरा थेट प्रक्षेपण: स्टार स्पोर्ट्स नेटवर्क, जिओहॉटस्टार