'नॉर्दर्न डर्बी' चा थरार; कोण खातं उघडणार?

आजच्या ‘नॉर्दर्न डर्बी’ मध्ये नवी मुंबईतील डॉ. डी. वाय. पाटील स्पोर्ट्स अकॅडेमीत दिल्ली कॅपिटल्स आणि यूपी वॉरियर्स आमने-सामने येणार आहेत. मात्र, महापालिका निवडणुकांमुळे हा सामना प्रेक्षकांविना खेळवला जाणार आहे. तीन वेळा अंतिम फेरी गाठलेल्या दिल्ली कॅपिटल्स आणि मागील हंगामात तळाला राहिलेल्या यूपी वॉरियर्स, या दोन्ही संघांचा वूमन्स प्रीमियर लीग (WPL) 2026 मधील प्रवास आतापर्यंत निराशाजनक ठरला आहे. सलग दोन पराभवांमुळे दोन्ही संघांवर दडपण आहे. तरीही, आजच्या सामन्यानंतर एक गोष्ट नक्की आहे की या दोघांपैकी एक संघ अखेर गुणतालिकेत खाते उघडणार आहे. या सामन्याला आणखी रंगत आणणारा पैलू म्हणजे मेग लॅनिंग. तीन हंगाम दिल्ली कॅपिटल्सचे नेतृत्व केलेली माजी कर्णधार लॅनिंग आता यूपी वॉरियर्सच्या कर्णधार म्हणून आपल्या जुन्या संघासमोर उभी ठाकणार आहे. दिल्लीची सूत्रे आता मुंबईकर जेमिमा रॉड्रिग्जकडे आहेत. लॅनिंगसारख्या दिग्गज खेळाडूची जागा भरून काढण्याचे आव्हान जेमिमासमोर असले तरी, आपल्या माजी कर्णधाराविरुद्ध प्रभावी कामगिरी करत छाप पाडण्याची संधी तिच्याजवळ आहे. संघांच्या लढतीत हा वैयक्तिक सामना विशेष लक्षवेधी ठरणार आहे. दोन्ही संघांना अनेक गोष्टी सुधारण्याची गरज आहे. दिल्ली कॅपिटल्सने दोन्ही सामने धावांचा पाठलाग करताना गमावले असून, चांगली सुरुवात करूनही ती विजयात रूपांतरित करण्यात अपयशी ठरली आहे. दुसरीकडे, यूपी वॉरियर्सना फलंदाजी प्रथम असो वा द्वितीय, कुठल्याही परिस्थितीत लय सापडलेली नाही. यावरून त्यांच्या फलंदाजी आणि गोलंदाजीमध्ये उणीवा जाणवतात. पराभूत झाले असूनही काही सकारात्मक बाबी समोर आल्या आहेत. दिल्लीकडून नवोदित नंदिनी शर्माने सर्वाधिक लक्ष वेधले आहे. गुजरात जायंट्सविरुद्धच्या मागील सामन्यात तिने घेतलेल्या हॅट्ट्रिकनंतर 24 वर्षीय चंदीगडच्या या गोलंदाजाने नव्या चेंडूवरचे नियंत्रण आणि कठीण क्षणी दाखवलेला संयम प्रभावित करणारा आहे. नंदिनीकडे विविधता आहे आणि ती अचूकपणे वापरण्याची क्षमता ठेवते. याशिवाय, लिझेल ली, लॉरा वोल्वार्ड्ट आणि मारिझान काप या अनुभवी दक्षिण आफ्रिकेच्या त्रिकुटाने फॉर्मची झलक दाखवली आहे. मात्र, दिल्लीला विजयासाठी त्यांच्याकडून अधिक मोठ्या योगदानाची अपेक्षा असेल. यूपी वॉरियर्सकडेही काही आशावादी बाबी आहेत. तिसऱ्या क्रमांकावर फलंदाजी करणारी फीबी लिचफिल्ड आत्मविश्वासपूर्ण दिसली आहे. मैदानाच्या प्रत्येक भागात फटके खेळण्याची तिची खासियत पुन्हा एकदा दिसून आली. लॅनिंग अजूनही स्थिर सलामी जोडीदाराच्या शोधात असताना, लिचफिल्डला सलामीला पाठवण्याचा विचार केला जाईल का, हा प्रश्न उपस्थित होतो. तिच्यासोबतच, मागील सामन्यात दीप्टी शर्मा आणि डिआंड्रा डॉटिन यांनी खालच्या फळीत दिलेले योगदान संघासाठी दिलासादायक ठरले आहे. मात्र, दोन्ही संघांसाठी सर्वात मोठी चिंता नेतृत्वाशी संबंधित आहे. अद्याप दोन्ही कर्णधारांनी स्पर्धेत आपली ठोस छाप पाडलेली नाही. क्रिकेटमध्ये अनेकदा कर्णधाराची वैयक्तिक कामगिरी आणि संघाचे यश यांचा थेट संबंध असतो. फलंदाजी किंवा गोलंदाजीतून कर्णधाराने दिलेला सूरच संघाच्या कामगिरीची दिशा ठरवतो. त्यामुळे लॅनिंग आणि जेमिमा, या दोघींनाही निर्णायक कामगिरी बजवावी लागणार आहे. WPL 2026 मधील पहिल्या गुणांच्या शोधात असलेल्या या दोन्ही संघांसमोर अखेर तोच प्रश्न उभा आहे—दिल्ली कॅपिटल्स की यूपी वॉरियर्स, कोणाचा मोहीमेला आज खऱ्या अर्थाने प्रारंभ होणार? आमने-सामने (मागील 5 सामने) दिल्ली कॅपिटल्स -3 | यूपी वॉरियर्स - 2 सामन्याची थोडक्यात माहिती दिनांक: 14 जानेवारी 2026 वेळ: संध्याकाळी 7:30 वाजता स्थळ: डॉ. डी. वाय. पाटील स्पोर्ट्स अकॅडेमी, नवी मुंबई थेट प्रक्षेपण: स्टार स्पोर्ट्स नेटवर्क, जिओहॉटस्टार