विचारे विरुद्ध फाटक लढत होण्याची चर्चा
ठाणे: दिवगंत आनंद दिघे यांच्या दोन शिष्यांमध्ये ठाणे लोकसभेची लढाई आता जवळपास निश्चित झाल्याचे बोलले जात आहे. मुख्यमंत्री एकनाथ शिंदे यांनी ठाण्यामध्ये रवींद्र फाटक यांना उमेदवारी देण्याचा निर्णय घेतल्याचं समजते.
महायुतीमध्ये ठाणे मतदारसंघ एकनाथ शिंदे यांच्याकडे आल्याची चर्चा असून ठाण्यात ठाकरे विरुद्ध शिंदे यांच्यात चुरशीची लढत होणार आहे. ठाकरेंकडून राजन विचारे यांना पुन्हा मैदानात उतरवले जाणार आहे, तर शिंदेंनी त्यांच्याविरोधात फाटक यांना मैदानात उतरवण्याचा निर्णय घेतला आहे. शिवसेनेत फूट पडल्यानंतर ठाण्याची लढाई प्रतिष्ठेची झाली आहे.
एकनाथ शिंदेंच्या शिवसेनेकडून विधान परिषदेचे माजी आमदार रविंद्र फाटकांना ठाणे लोकसभेची उमेदवारी 99 टक्के निश्चित झाली आहे. पुढील काही दिवसांमध्ये रवींद्र फाटकांच्या उमेदवारीवर शिक्कामोर्तब होईल, अशी माहिती शिंदेंच्या शिवसेनेच्या सूत्रांकडून मिळाली आहे. ठाकरेंच्या शिवसेनेचे विद्यमान खासदार राजन विचारे विरूद्ध रविंद्र फाटक अशी लढत होणार आहे. रविंद्र फाटक हे मुख्यमंत्री एकनाथ शिंदे यांचे निकटवर्तीय म्हणून ओळखले जातात.
रवींद्र फाटक हे दोन मतदारसंघांमधून निवडणूक लढवण्यासाठी इच्छुक होते. ठाणे आणि रत्नागिरी-सिंधुदुर्ग मतदारसंघासाठी फाटक यांनी फिल्डिंग लावली होती. एकनाथ शिंदे यांनी फाटक यांना ठाण्यातून उमेदवारी देण्याचा निर्णय घेतल्याचे समजते. त्यामुळे सिंधुदुर्गमध्ये किरण सामंत यांचा दावा अधिक मजबूत झाला आहे.
ठाणे लोकसभा मतदारसंघात सहा विधानसभा क्षेत्र येतात. त्यापैकी ठाणे शहर या ठिकाणी भाजपचे आमदार संजय केळकर आहेत तर ओवळे-माजिवडे या मतदारसंघात शिवसेनेचे शिंदे गटाचे आमदार प्रताप सरनाईक हे आहेत. कोपरी पाचपाखाडी मतदारसंघाचे नेतृत्व राज्याचे मुख्यमंत्री एकनाथ शिंदे करत आहेत. तर मीरा-भाईंदर या मतदारसंघात अपक्ष आमदार गीता जैन या विजय झाल्या आहेत. भाजपचे नेते गणेश नाईक यांच्याकडे ऐरोली मतदारसंघ आहे. तर मंदा म्हात्रे यांच्याकडे बेलापूर मतदारसंघ आहे. लोकसभेचे चित्र पाहता या क्षेत्रात सर्व आमदार महायुतीचे आहेत. यामुळे महाविकास आघाडीचे खासदार राजन विचारे यांना या निवडणुकीत विजयी होण्यासाठी चांगलाच घाम गाळावा लागणार आहे. ही निवडणूक राज्याचे मुख्यमंत्री एकनाथ शिंदे यांच्यासाठी प्रतिष्ठेची आहे. या लोकसभा निवडणुकीमध्ये जास्तीत जास्त खासदार राज्यामधून निवडून आणण्यासाठी मुख्यमंत्री म्हणून एकनाथ शिंदे यांच्यावर जबाबदारी आहे.
या मतदार संघातून शिवसेनेचे प्रवक्ते नरेश म्हस्के, भाजपचे विनय सहस्त्रबुद्धे, संजीव नाईक हे देखिल इच्छुक आहेत. त्यामध्ये श्री.फाटक यांनी बाजी मारली असल्याचा दावा सूत्रांनी केला आहे.