नवी मुंबई: नवी मुंबई शहराला पाणी पुरवठा करणाऱ्या मोरबे धरणावरील मुख्य जलवाहिनी अजीवली गावाजवळ बुधवारी सकाळी फुटल्याने शहरात दिवसभर पाणी संकट जाणवले. मंगळवारीच मनपाने जलवाहिनीच्या देखभाल दुरुस्तीकरीता पाणी बंद ठेवले होते.
दुसऱ्या दिवशी जलवाहिनी फुटल्याने नवी मुंबईकरांवर सलग दोन दिवस पाणी संकट ओढवले. नवी मुंबई महापालिकेच्या भोकरपाडा जलशुद्धीकरण केंद्र व मुख्य जलवाहिनीच्या देखभाल दुरूस्तीचे काम मंगळवार ८ ऑगस्ट रोजी करण्यात आले होते. यामुळे एक दिवस पाणीपुरवठा बंद ठेवण्यात आला होता. बुधवारी कमी दाबाने पाणीपुरवठा होणार होता. या पाणी पुरवठ्याला पहाटे सुरुवात होताच पुन्हा एकदा अजिवली गावाजवळ जलवाहिनी फुटली. यामुळे जलवाहिनीवरील पाणी पुरवठा बंद करून तत्काळ दुरूस्तीचे काम सुरू करण्यात आले आहे.
दुरूस्तीचे काम सायंकाळपर्यंत सुरू राहणार असल्याने शहरात संध्याकाळपर्यंत पाणीपुरवठा बंद ठेवण्यात येणार असून गुरुवारी कमी दाबाने पाणीपुरवठा होईल, अशी माहिती मनपा पाणीपुरवठा विभागामार्फत देण्यात आली.
आधीच एक दिवस देखभाल दुरुस्तीसाठी पाणी बंद ठेवल्याने दुसऱ्या दिवशी जलवाहिनी फुटल्याने नवी मुंबईकरांवर सलग दोन दिवस पाणी संकट ओढवले.