शासकीय इतमामात अंतिम संस्कार
मुंबई: माजी लोकसभा अध्यक्ष तथा महाराष्ट्राचे माजी मुख्यमंत्री मनोहर जोशी यांच्या पार्थिवावर मुंबईतील शिवाजी पार्क स्मशानभूमीत शासकीय इतमामात अंत्यसंस्कार करण्यात आले. त्यांचे मुंबईतील पीडी हिंदुजा रुग्णालयात शुक्रवार 23 फेब्रुवारी रोजी सकाळी निधन झाले.
माजी लोकसभा अध्यक्ष तथा शिवसेनेचे पहिले मुख्यमंत्री मनोहर जोशी यांचं वयाच्या 86 व्या वर्षी हृदयविकाराच्या झटक्याने निधन झाले होते. त्यांनी मुंबईतील पीडी हिंदुजा रुग्णालयात शुक्रवारी सकाळी त्यांनी अखेरचा श्वास घेतला होता. त्यांच्यावर आज मुंबईतील शिवाजी पार्क स्मशानभूमीत शासकीय इतमामात अंत्यसंस्कार करण्यात आले. त्यांनी 40 वर्षांहून अधिक शिवसेना पक्षासाठी काम केले होते.
माजी लोकसभा अध्यक्ष तथा महाराष्ट्राचे माजी मुख्यमंत्री मनोहर जोशी यांचे पार्थिव इमारतीतून खाली आणल्यानंतर त्यांना पोलिसांनी शासकीय इतमामात मानवंदना दिली. यावेळी मनोहर जोशी यांच्या पार्थिवावर तिरंगामध्ये ठेवण्यात आले होते. मानवंदना दिल्यानंतर अंत्ययात्रा शिवाजी पार्क येथील स्मशानभूमीत पोहोचली.
मनोहर जोशी यांच्यावर शासकीय मानवंदना दिल्यानंतर त्यांच्या दादर येथील निवासस्थानापासून अंत्ययात्रेला सुरुवात झाली आहे. या अंत्ययात्रेत शेकडो शिवसैनिक सहभागी झाले होते. यावेळी शिवसौनिकांनी अमर रहे, अमर रहे, मनोहर जोशी अमर रहेच्या जोरदार घोषणा दिल्या.
मनोहर जोशी यांचे पार्थिव पहिल्यांदा दादर येथील शाखेत ठेवण्यात आले होते. यानंतर त्यांचे पार्थिव शिवाजी पार्क येथील मीनाताई ठाकरे यांच्या पुतळ्यासमोर ठेवण्यात आले. यावेळी मुख्यमंत्री एकनाथ शिंदे, उप मुख्यमंत्री देवेंद्र फडणवीस, उपमुख्यमंत्री अजित पवार, शिवसेना (उबाठा) पक्षप्रमुख उद्धव ठाकरे, आदी अनेक नेत्यांनी मनोहर जोशी यांच्या पार्थिवाचे दर्शन घेत त्यांना श्रद्धांजली वाहिली.
राजकारणात मोठी पोकळी
मनोहर जोशी यांच्या निधनाने महाराष्ट्राच्या राजकारणात मोठी पोकळी निर्माण झाली आहे. भिक्षुक म्हणून सुरू झालेला त्यांचा जीवन प्रवास लोकसभा अध्यक्षपदापर्यंत पोहोचला होता. पण राजकारण करण्यापेक्षा उद्योजक होण्याचे मनोहर जोशींचे स्वप्न होते. मराठी माणसांनी व्यवसाय करावा, अशी त्यांची इच्छा होती. त्यामुळेच त्यांनी मुंबई महापालिकेतील लिपिकाची नोकरी सोडून दादरमध्ये कोहिनूर टेक्निकल इन्स्टिट्यूटची स्थापना केली होती.