चार आरोपींना अटक
ठाणे : बदलापुरात एका माजी नगरसेवकाला अश्लील फोटो व्हायरल करण्याची धमकी देत ५० लाख रुपयांची खंडणी मागितल्याचे प्रकरण समोर आले होते. या प्रकरणी बदलापूर पूर्व पोलीस ठाण्यात माजी नगरसेवकाच्या तक्रारीवरून पोलिसांनी गुन्हा दाखल केला होता. यानंतर आता चार आरोपींना बेड्या ठोकल्या आहेत.
अक्षय उर्फ बकरी जाधव, रोनित आडारकर, दीपक वाघमारे आणि पुष्कर कदम अशी अटक केलेल्या आरोपींची नावे आहेत.
पोलिसांनी दिलेल्या माहितीनुसार, बदलापूरमधील माजी नगरसेवक शैलेश वडनेरे यांना महिन्याभरापूर्वी एका अज्ञात नंबरवरून व्हॉट्सॲपवर एक व्हिडिओ आला होता. या व्हिडिओमध्ये त्यांचे अश्लील फोटो होते. हा व्हिडिओ व्हायरल करण्याची धमकी देत समोरच्या आरोपीने त्यांच्याकडे ५० लाख रुपयांची खंडणी मागितली. विशेष म्हणजे आरोपी कर्जत, दादर, बदलापूर, वांगणी अशा ठिकाणी जाऊन तेथून धमकीचे कॉल करत होते. सुरुवातीला हा खोडसाळपणा असल्याचे वाटले. त्यामुळे शैलेश वडनेरे यांनी त्याकडे लक्ष दिले नाही, मात्र खंडणीखोरांचा तगादा वाढल्यानंतर याबाबत शैलेश वडनेरे यांनी बदलापूर पूर्व पोलीस ठाण्यात तक्रार केली.
या तक्रारीची गंभीर दखल घेत बदलापूर पूर्व पोलीस ठाण्याचे वरिष्ठ पोलीस निरीक्षक किरण बालवडकर आणि राजेश गज्जल यांनी तांत्रिक तपास करत असतानाच या गुन्ह्यात मुख्य आरोपी अक्षय उर्फ बकरी जाधव, याच्यासह रोनित आडारकर, दीपक वाघमारे आणि पुष्कर कदम अशी चार जणांची नावे पोलीस तपासात समोर आली. त्यानंतर पोलिसांनी सापळा रचत चौघांना ११ मार्चला बदलापूरमध्ये अटक केली. यानंतर या सर्वांना १२ मार्चला न्यायालयात हजर केल्यानंतर न्यायालयाने त्यांना १५ मार्चपर्यंत पोलीस कोठडी सुनावली आहे.
अटक केलेल्या आरोपींपैकी अक्षय उर्फ बकरी जाधव आणि दीपक वाघमारे या दोघांवर यापूर्वी अंबरनाथमध्ये एका नामांकित डॉक्टरच्या घरावर कोट्यवधी रुपयांचा दरोडा टाकल्याचा गुन्हा दाखल आहे. त्या गुन्ह्यातून जामीनावर सुटल्यानंतर झटपट पैसे कमावण्याच्या उद्देशाने त्यांनी माजी नगरसेवक शैलेश वडनेरे यांना खंडणीसाठी धमकी दिली होती. मात्र बदलापूर पूर्व पोलिसांनी त्यांचा हा डाव हाणून पाडत त्यांना पुन्हा एकदा बेड्या ठोकल्या आहेत.